सत्तारुढ दलया हे नाराबाजी दथुर्इ एमएमसी संसदय् टेबल, एमाले मौन
येँ (नेपालभाषा टाइम्स)÷नेपाः सरकार व अमेरिकी सहयोग संस्था मिलेनियम च्यालेन्ज कर्पोरेशन (एमसीसी) दथुइ जूगु अनुदान सम्झौता म्हिगः संघीय संसद सचिवालय, प्रतिनिधिसभाया विधेयक शाखाय् दर्ता जूगु दु ।
ताः ईया विवाद लिपा सञ्चार मन्त्री ज्ञानेन्द्र बहादुर कार्कीं प्रतिनिधिसभाया बैठकय् एमसीसी टेबल यानादीगु खः । म्हिगः अर्थमन्त्री जनार्दन शर्मां एमसीसी टेबल यायेगु कार्यसूची दुगु खःसां मन्त्री शर्मा सदनय् हे मवःगुलिं मन्त्रीं कार्कीं हे टेबल यानादीगु खः ।
२०७४ भदौ २९ गते तत्कालीन अर्थमन्त्रीया रुपय् कार्कीं हे नेपाःपाखें सम्झौताय् हस्ताक्षर यानादीगु खः। थ्व स्वयां न्ह्यः प्रधानमन्त्री केपी ओलीया सरकार दुबलय् अर्थमन्त्री युवरजा खतिवडां अनुमोदनया नितिं संसदय् न्ह्यब्वःगु खः । म्हिगः मन्त्री कार्कीं एमसीसी सम्झौता न्ह्यब्वयाच्वंगु इलय् एमाले, नेमकिपा, माओवादी केन्द्र व नेकपा–एसया सांसदतय्सं नाराबाजी यानाच्वंगु खः ।
एमसीसी सम्झौता संसदय् दर्ता याये न्ह्यः गठबन्धन दल दथुइ बैठक च्वंगु खः । देउवा निवासय् च्वंगु उगु बैठकय् एमसीसी सदनय् पेश यायेगु सहमति जूगु खःसा वयां लिपा सदनय् न्ह्यब्वयेगु ज्या जूगु खः ।
उकथं हे अध्यक्ष दाहालं एमसीसीया विरोध यासें प्रदर्शन यानाच्वंपिंत प्रहरी पाखे जूगु दमनया नं भत्र्सना यासें घाःपाः जूपिनिगु स्वास्थ्य लाभया कामना नं यानादीगु दु ।
उकथं हे नेकपा एसया अध्यक्ष माधव नेपालं नं एमसीसी टेबल जूसां पास यायेत धाःसा थःपिनिगु समर्थन मदइगु खँ धयादीगु दु । प्रतिनिधिसभा बैठक लिपा सञ्चारकर्मीतिलिसे खँ ल्हायेगु झ्वलय् वय्कलं उगु खँ धयादीगु खः ।
मेखे प्रधानमन्त्री शेरबहादुर देउवां धाःसा एमसीसी सदनय् प्रवेश जूगुलिं आः थ्व पास जुइगु खँ धयादीगु दु । संसदं पिहां वयेगु झ्वलय् सञ्चारकर्मीतय्सं ‘आः एमसीसी छु जुइ ?’ धकाः न्यंगु न्ह्यसःया लिसः बीगु झ्वलय् धयादिल, वय्कलं धयादिल, ‘आः पास जुइ ।’
एमाले अझं मौन !
प्रमुख प्रतिपक्षी नेकपा एमालेया अध्यक्ष केपी ओलीं नेपाः विदेशी चलखेल जुइगु थाय् जुइधुंकाः जक सरकारं एमसीसी सदनय् न्ह्यब्वःगु द्वपं बियादीगु दु । संसद भवनय् छुं एमाले सांसदतलिसे सहलह यासें ओलीं एमसीसीयात न्हापा हे पारित याःगु खःसा आःया अवस्था मवइगु खँ नं धयादीगु दु ।
ओलीं धयादिल, ‘विदेशी चलखेल जुइवं बल्ल एमसीसी संसदय् वल, थुकिया बारे चीन व अमेरिकां न्ववायेमाःगु अवस्था वल, एमसीसीयात कयाः न्हापा हे निर्णय याःगु खःसा आःया अवस्था मवइगु खइ ।’
वय्कलं एमसीसीया सवालय् थःपिनिगु भूमिका बारे छुं मधाःसां संसदय् पंगः थनेगु थःपिनिगु ज्यायात धाःसा निरन्तरता बीगु खँ नं धयादीगु दु ।
म्हिगः सदनय् एमालेया सुं नं नेतां न्वमवाःसां शुरुंनिसें एमसीसीया विरोध याना वयाच्वंम्ह एमाले सांसद भीम रावल धाःसा न्ववाके बिउगु खँय् नं एमालें सभामुखया विरोध याःगु दु ।
LEAVE YOUR COMMENTS