प्रदेश १ (कोशी) थौं विश्वासया मत
येँ (नेपालभाषा टाइम्स)- १ नम्बर प्रदेश (कोशी) इ एमालें न्यागू मन्त्रालय माग यायेवं हाकनं राजनीतिक संकट ब्वलंगु दु । एमालेया ग्वाहालिइ कांग्रेस सांसद केदार कार्की मुख्यमन्त्री नियुक्त जुइवं एमालें न्यागू मन्त्रालय दाबी यायेगु तयारी याःगु खः । थुकिं यानाः मुख्यमन्त्रीयात मन्त्रालय भागबन्डा यायेत समस्या जुइगु खनेदु धाःगु दु ।
मुख्यमन्त्री कार्कीं आः सहमतिया सरकार दयेकेगु धकाः प्रतिक्रिया बियादीवं एमाले संसदीय दलया नेता हिक्मत कार्कीं उकियातत लिसः बिसें माओवादीयात सरकारय् हल धाःसा समर्थन याये मफइगु ख्याच्वः बियादीगु दु । सरकार गठन बारे थौं निगू पक्ष दथुइ सहलह यायेगु तयारी जुयाच्वंगु दु ।
थौं मुख्यमन्त्री कार्कीं थौं विश्वासया मत कयादी । एमालें विश्वासया मत काये न्ह्यः हे मन्त्रालय भागबण्डा यायेमाः धयाच्वंगु दु । तर थःत कांग्रेसया संस्थापन पक्ष लिसें माओवादीं नं विश्वासया मत बीगु जूगुलिं एमालेया मागयात गुकथं कायेगु धकाः मुख्यमन्त्री कार्की अलमलय् लानाच्वंगु दु ।
एमालें थःपिनि ग्वाहालिं मुख्यमन्त्री जूगुलिं थःत अप्वः मन्त्रालय माः धकाः दावी यानाच्वंगु दु । प्रदेशय् मुक्कं गुंगू मन्त्रालय दु । सीदु कथं कार्कीं एमालेया मत मवइगु जूसां नं विश्वासया मत कायेगु तयारी यानाच्वंगु दु । उकिया निंतिं माओवादीलिसे खँ ल्हानाच्वंगु दु । थम्हं प्रदेशय् सहमतीय सरकार दयेकेगु तयारी यानाच्वंगु कारणं छुं गथे जुयाः एमालें विश्वासया मत मबिल धाःसा राप्रपाया समर्थन कयाः जूसां विश्वासया मत कायेगु तयारी नं मुख्यमन्त्री कार्कीं यानाच्वंगु दु । मुख्यमन्त्री कार्कीं थ्व इलय् एमालेया दबाब महसुस यानाच्वंगु खँ नं धाःगु दु ।
थ्व स्वयां न्ह्यःया गठबन्धनय् राप्रपां १ नम्बर प्रदेशय् सरकार गठन यायेगु झ्वलय् थःपिंसं सत्ता गठबन्धनयात विश्वासया मत बीगु धाःगु खः । तरअनया राजनीतिक समीकरण हिलेवं राप्रपां तटस्थ च्वनेगु नीति ज्वंगु दु । तर छुं जुयाः हाकनं पुलांगु हे सत्ता गठबन्धन कायम जुइगु जुल धाःसा राप्रपां मुख्यमन्त्रीयात विश्वासया मत बीफइगु अवस्था दु ।
राप्रपां मुख्यमन्त्री कार्कीयात विश्वासया मत बीगु अवस्थाय् प्रदेशय् प्वनाच्वंगु सभामुख पद धाःसा थःत माः धकाः दावी यायेगु तयारी यानाच्वंगु खँ धाःगु दु । कोशीया राजनीतिक समीकरण मस्यंगु इलय् हे प्रधानमन्त्री पुष्पकमल दाहालं राप्रपाया अध्यक्ष राजेन्द्र लिङदेनलिसे खँल्हाबल्हा याःगु खःसा उकी राप्रपायात सभामुख बीगु बचं बियादीगु खँ सीदुगु दु । सभामुख थःत वइगु खःसा मुख्यमन्त्री पदय् माओवादीयात समर्थन यायेगु खँ नं राप्रपां धयातःगु दु ।
LEAVE YOUR COMMENTS