कांग्रेस असन्तुष्ट पक्षपाखें एमालेलिसे जानाः मुख्यमन्त्री दावी

येँ (नेपालभाषा टाइम्स)- प्रदेश नम्बर १ या मुख्यमन्त्रीया निंतिं नेपाली कांग्रेसया छगू पक्ष एमालेलिसे मिले जूवनेवं राजनीतिक ट्वीस्ट वइगु सम्भावना ब्वलंगु दु । केन्द्रीय सत्ता गठबन्धनय् दुपिं माओवादी केन्द्र व कांग्रेस संस्थापन पक्षं माओवादीया इन्द्र आङ्बोयात मुख्यमन्त्री दयेकेत हस्ताक्षरसहित प्रदेश प्रमुखयाथाय् दावी पेश याःगु खः, तर छथ्व कांग्रेसया असन्तुष्ट पक्ष धाःसा केदार कार्कीयात मुख्यमन्त्री दयेकेगु दावी यानाः एमालेया प्रदेश सांसदतलिसे प्रदेश प्रमुख पर्शुराम खापुङया ज्याकुथिइ वंगु दु
कांग्रेसया शेखर कोइराला पक्षं प्रदेशसभा दुजः केदार कार्कीयात एमालेया ग्वाहालिं मुख्यमन्त्री दयेकेगु निंतिं बिहिवाः ४७ सांसदया हस्ताक्षर सहित प्रदेश प्रमुख समक्ष दावी पेश याःगु खः ।

थन नेता कोइराला पक्षया च्याम्ह सांसद दु । उकथं एमालेयाके उपसभामुख सहित ४० म्ह सांसद दु । कोइराला पक्षया थ्व पलाःयात कांग्रेस संस्थापन पक्षं गुकथं काइ धयागु स्पष्ट मजूनि । सरकार गठनया निंतिं कांग्रेस संस्थापन पक्षं कोइराला पक्षयात दबाबय् तयेफइगु सम्भावना नं म्हो दुगु खँ सीदुगु दु ।

संविधानया धारा १६८ (५) कथं दावी पेश यानाः मुख्यमन्त्रीं विश्वासया मत काइगु इलय् पार्टीया ह्विप लगे मजुइगु जुयाः कोइराला पक्षया कार्की मुख्यमन्त्री जुइगु सम्भावना अप्वः दुगु विश्लेषण जुयाच्वंग्ु दु ।

थ्वहे झ्वलय् १ नम्बर प्रदेशया न्हूम्ह सभामुख कथं राप्रपायात ह्वःताः चूलाःवःगु दु । मुख्यमन्त्रीया दावी यानाच्वंम्ह आङ्बोयात समर्थन याइगु अवस्थाय् राप्रपायात सभामुख बीत सत्ता गठबन्धन सकारात्मक जूगु दु । म्हिगः बालुवाटारय् गठबन्धनया बैठकं राप्रपायात सभामुख बीगु निर्णय याःगु खः ।

मध्यावधी चुनाव मवनेगु कथं राप्रपां आङ्बोयात समर्थन यायेत्यंगु खः । थ्वहे झ्वलय् कांग्रेस संसदीय दलया उपनेता हिमाल कार्कीं थःगु पदं राजीनामा बियादीगु दु । कार्कीं न्हूगु सरकार गठन प्रक्रियायात कयाः असन्तुष्टि प्वंकुसें राजीनामा बिउगु खः । कार्कीं थीथी कारणं यानाः संसदीय दलया उपनेता जुयाः भूमिका म्हितेत असमर्थ जूगुलिं पदं राजीनामा बियागु खँ धयातःगु दु । उकथं हे प्रदेससभा दुजःया हैसियतं धाःसा थः दलप्रति इमान्दार जुयाच्वनेगु प्रतिबद्धता नं प्वंकातःगु दु ।

निगुलिं पक्षय् च्याम्ह सांसदतय् नां
म्हिगः प्रदेशया मुख्यमन्त्री दाबी यायेत पेश याःगु निगुलिं पक्षय् कांग्रेसया च्याम्ह सांसदया नां लाःगु दु । उकी केदार कार्की, रामकुमार खत्री, शम्शेर राई, इन्दिरा थापा, लिलाकुमारी राई, गोविन्द गिरी, मानबहादुर लिम्बु व सुनिताकुमारी गुरुङपिं खः ।