काठमाडौं नेवाः किन्डरगार्टेनय् ग्राजुएसन

येँ – थनया खुसिबुँइ च्वंगु काठमाडौं नेवाः किन्डरगार्टेनय् युकेजी तगिमय् ब्वने क्वचाःपिं मस्तय् ग्राजुएसन ज्याझ्वः जुल । ब्वनेकुथिया न्हूगु भवनय् जूगु थ्व गुक्वःगु ग्राजुएन ज्याझ्वः खः । किन्डरगार्टेनया प्रिन्सिपल रविन महर्जनया सभापतित्वय् जूगु ज्याझ्वलय् मूपाहांकथं नेपालभाषाया नांजाःम्ह कलाकार राजेन्द्रमान शाक्य झायादीगु खः ।

ब्वनेकुथिया ग्वसालय् वंगु छुं ई न्ह्यः जक जूगु मास्टर एण्ड मिस काठमाडौं नेवाः किन्डरगार्टेनय् मास्टर काठमाडौं नेवाः किन्डरगार्टेन जुयादीम्ह निर्वेश श्रेष्ठं लसकुस यानादीगु ज्याझ्वलय् अभिभावकपाखें सुजनविला वज्राचार्य व प्रतिमा श्रेष्ठं नुगःखँ तयादीगु खः । युकेजी तगिं ब्वने क्वचायेकूपिं मस्तय्सं म्येँ, सांगीतिक धुन, चेतनामूलक नाटक, हुलाप्याखं व रेना महर्जनं न्ह्यइपुक म्येँ न्ह्यब्वयादीगु खः । ज्याझ्वलय् मूपाहां शाक्यं ब्वने क्वचायेकूपिं मस्तय्त दसिपौ लःल्हानादीगु खःसा विशेष पाहांकथं झायादीम्ह नेवाः बस्ती नेवाः स्कुल अभियानया संयोजक दीपक तुलाधरं लुमन्तिं लःल्हानादीगु खः ।