छेँज्या याइपिं प्रहरी लित महःनि

छेँय् छेँय् तयातःपिं प्रहरी जवान लित छ्वयेत गृहया पौ

येँ – थौंकन्हय् पदय् च्वनाच्वंपिं वहालवाला व पूर्व विशिष्ट व्यक्तितय्सं थःथाय् छेँय् माली, भान्छे व चालक ज्या यायेगु लागिं यंका तःपिं प्रहरी व सशस्त्र प्रहरीया जवान तुरुन्त लित छ्वया हजि धकाः गृह मन्त्रालयं अल्टिमेटम सहित पौ च्वया छ्वःसां आः तक अज्याःपिं सुरक्षाकर्मीत लित छ्वया हयेगु ज्या धाःसा जूगु मदुनि ।

गृह मन्त्रालयपाखें अथे सुरक्षाकर्मी यंकातःपिं भीआईपीतय्त न्हयुन्हुया दुने थःथाय् तयातःपिं प्रहरी जवानत सम्बन्धित निकायय् तुं लित छ्वया बिउ धकाः पौ छ्वःगु खः । अथे पौ छ्वःगु थौं झिन्हु पुलेधुंकूसां सुं हे भीआईपीं सुं हे सुरक्षाकर्मीयात लित धाःसा छ्वया महःगु खँ धाःगु दु ।

थौंकन्हय् पद दुपिं व न्हापा पदय् दुसां आः रिटायर्ड जुइधुंकूपिं विशिष्टतय्सं तकं थःगु ज्याय् भुतुली, क्यबय् ज्या यायेत व गाडी चलेत यायेत करिब द्वःछिम्ह धइथें प्रहरी जवानत यंकातःगु दु । थज्याःगु विषयय् गृह मन्त्रालयया ध्यान वनेवं अज्याःपिं सुरक्षाकर्मी लित छ्वया हजि धकाः पौ हे च्वयाः इनाप याना छ्वःगु खः ।

मन्त्रालय सूत्रं धाः कथं गृहपाखें थ्व विषयय् थथे अभियान हे थें यानाः पौ च्वयाः कारवाही न्ह्याकूगु थ्वहे न्हापांखुसी खः । पौ च्वयेधुंकाः लित छ्वया हयेगु प्रक्रिया जक न्ह्यानाच्वन धाःगु दु, लित धाःसा छ्वया हःगु मदुनि । गृह मन्त्रालयं आः लिपां विशिष्ट मनूतय् सुरक्षाया लागिं धकाः सुरक्षाकर्मी छ्वयेगु ज्याय् समेत बिचाः याये मालीगु खँय् नं विमर्श यानाच्वंगु दु । सुरक्षाया नामय् आपालं सुरक्षाकर्मी सुरक्षालिसे सम्बन्धित मजूगु थासय् नं प्रयोग यानाच्वंगु खँ नं सूत्रं धाःगु दु ।

आः कानून हे हयेगु तयारी

प्रहरी व सशस्त्र प्रहरीया आपालं जवानतय्त अनावश्यक ज्याय् छ्यलातःगु खँयात ध्यानय् तयाः आः सरकारं बिस्कं कानून हे हयेगु तयारी यानाच्वंगु सीदुगु दु । खास यानाः सुरक्षालिसे सम्बन्धित मजूगु ज्याय् सुरक्षाकर्मीयात छ्यले दइ मखु धकाः अज्याःगु कानून हयेत्यंगु खः । थुकिया मस्यौदा तयार जुइधुंकूगु दुसा आः संसद च्वनीबलय् उकियात न्ह्यब्वयाः पारित याइ ।

प्रधानमन्त्री केपी ओलीं हे छेँज्या यायेगु लागिं समेत प्रहरी व सशस्त्र प्रहरीया जवानत छ्यलाच्वंगु खँय् ध्यानाकर्षण यासें अज्याःगु ज्या तुरुन्त दिकि धकाः गृह मन्त्रालययात निर्देशन बियादीगु खः । प्रधानमन्त्रीपाखें हे निर्देशन वःगुलिं गृहमन्त्री रामबहादुर थापा बादलं तुरुन्त हे थुकिया लागिं पहल यानाः पौ छ्वयेगु ज्या याःगु खः । आः कानून वयेधुंकल कि अज्याःगु ज्या याइपिं पदाधिकारीतय्त सजायँ समेत जुइगु व्यवस्था जुइगु खँ धाःगु दु ।