ने. सं. ११४३ चौलाथ्व सप्तमी -

आः चीहाकःगु प्रक्रियां मेलम्चीया लः हइगु

येँ – सरकारं मेलम्ची खानेपानी आयोजनाया ल्यं दनिगु ज्या चीहाकःगु प्रक्रियां क्वचायेकेगु निर्णय याःगु दु । थुगु वालय् च्वंगु मन्त्रिपरिषदया बैठकं सार्वजनिक खरिद ऐनया विशेष व्यवस्थाया उपयोग यानाः आयोजना दयेकेगु निर्णय याःगु खः । प्रधानमन्त्री केपी ओलीया निर्देशनय् खानेपानी मन्त्री बिना मगरं मेलम्चीया ल्यं दनिगु ज्या क्वचायेकेगु सम्बन्धी प्रस्ताव मन्त्रिपरिषदय् यंकूगु खः ।

इटालियन ठेकेदार कम्पनी सीएमसी ठेक्का त्वःताः बिसिउँ वंगुलिं आयोजनाया ज्या ठप्प जुयाच्वंगु खः । वंगु न्याला न्ह्यवंनिसें मेलम्ची आयोजनाया ज्या ठप्प जुयाच्वंगु खःसा प्रधानमन्त्रीया विशेष निर्देशन लिपा उगु आयोजनाया ज्या न्ह्याकेगु प्रक्रिया मन्त्रिपरिषदय् छ्वःगु खः ।

मेलम्चीयात आः एडीबी व परामर्शदाता कम्पनी इप्टिसां बिउगु प्रतिवेदनया आधारय् दयेकेगु निर्णय मन्त्रिपरिषदं याःगु खः । एडीबी व इप्टिसां झिगू प्याकेज दयेकाः ज्या न्ह्याके फइगु सुझाव बिउगु खः । मेलम्चीइ आः हेड वक्र्स, भेन्टिलेसन, सुरुङ फिनिसिङ व गेट दयेकेगु लिसें २ अर्ब २० करोड तका बराबरया ज्या ल्यं दनिगु एडीबी व इप्टिसां बिउगु प्रतिवेदनय् न्ह्यथनातःगु दु ।

मेलम्चीया ल्यं दनिगु ज्या याकनं क्वचायेकेत संसदया विकास तथा प्रविधि समितिं नं वंगु माघ १४ गते निर्देशन बिउगु खः । मेलम्चीया ल्यं दनिगु ज्या न्ह्याकेगु निंतिं सरकारं सर्वदलीय सहमति मालाः ज्या न्ह्याकेगु तयारी यानाच्वंगु दु । मेखे ठेकेदारतय्सं धाःसा थःपिंत बीमानिगु ध्यबा मबीकं ज्या न्ह्याके मबीगु खँ धाःगु दु ।

लःया लागिं संघर्ष

स्वनिगःया जनतां आः लःया लागिं संघर्ष याइगु जूगु दु । त्वनेगु लःया निंतिं सरकारयात दबाब बीत थ्वहे वइगु जेठ ३२ गते येँया थापाथलीइ छगू विशाल नागरिक प्रदर्शन याइगु जूगु दु । उकी करिब निगू लाख मनुखं ब्वति काइगु खँ धाःगु दु । उगु ज्याझ्वःया बारे जानकारी बीत थौं यलया बगलामुखीइ छगू भेला यायेत्यंगु दु । खानेपानीया निंतिं नागरिक दबाब समूह नांगु पुचलं उगु ज्याझ्वः यायेत्यंगु खः । जेठ ३२ गतेया भेला शान्तिपूर्ण जुइगु खँ धाःगु दु ।