बागमति सरकारय् एमाले दोमन
येँ (नेपालभाषा टाइम्स)- बागमति प्रदेशय् सरकार त्वःतेगु कि मत्वःतेगु धइगु बारे नेकपा एमाले दुने निगू धार पिहां वःगु दु । केन्द्रय् सरकारं पिहां वयेधुंकूगुलिं प्रदेशय् नं सरकार त्वःताः पिहां वयेमाःगु बिचाः एमालेया छुं मन्त्रीतय्सं धाःगु दुसा गुलिं मन्त्रीतय्सं धाःसा केन्द्र व प्रदेश बिस्कं बिस्कं जूगुलिं केन्द्रं पिहां वयेवं तुं प्रदेशं नं पिहां वयेमाः धइगु मदु धायेगु यानाहःगु दु ।
बागमति प्रदेशया श्रम, यातायात तथा रोजगार मन्त्री एकालाल श्रेष्ठं तत्काल सरकार त्वःतेमाःगु बिचाः तयाच्वंगु दुसा प्रदेश सरकारया प्रवक्ता लिसें आर्थिक मामिला तथा योजना मन्त्री जगन्नाथ थपलियां धाःसा तत्काल सरकारं पिहां वयेगु निर्णय पाय्छि मजू धासें सरकारय् च्वनाच्वनेगु खँ धाःगु दु ।
मेखे मन्त्री श्रेष्ठं केन्द्रया निर्देशन कथं सरकारयात बिउगु समर्थन लित कयाः मन्त्रीतय्सं राजीनामा बीमाःगु खँ धासें धयादिल, ‘जिपिं सरकारय् च्वनेमाःगु परिस्थिति मन्त । आः जिमिसं सरकार त्वःतेमाः, केन्द्रया कथं हे प्रदेशय् नं पार्टीं सरकार त्वःती, केन्द्रया निर्देशन मवयाः पियाच्वनागु जक खः ।’
मन्त्री थपलियां धाःसा राजनीतिया कोर्स हिलेवं संघीय सरकारं पिहां वःसां प्रदेश सरकार धाःसा तत्काल मत्वःतेगु खँ धयादीगु दु । वय्कलं केन्द्र व प्रदेशया परिस्थिति बिस्कं जूगुलिं सरकार त्वःतेगु निर्णय मजूगु खँ धयादीगु दु ।
मन्त्री थपलियां धयादिल, ‘केन्द्रय् सत्ता समीकरण हिलेवं प्रदेशय् नं हिलेमाः धइगु जुइ मखु । जिमिसं तत्काल प्रदेश सरकारं पिहां वयेगु निर्णय यानागु मदु व सरकार त्वःतेगु नं जुइ मखु । सरकार त्वःतेगु बारे प्रदेश समितिं हे निर्णय याइ । लिपांगु घटनाक्रमयात कयाः प्रदेश समितिइ सहलह जुयाच्वंगु दु ।
उकथं हे बागमति प्रदेशया कृषि तथा पशुपन्छी विकास मन्त्री केशव प्रसाद पोखरेलं अझ छुं न्हि प्रदेश सरकार त्वःतेगु परिस्थिति मदुगु खँ धयादीगु दु । केन्द्रपाखे तत्काल गुगुं नं कथंया निर्देशन मवःगु व प्रदेशया राजनीतिक परिस्थिति बिस्कं जूगुलिं आःया हे अवस्थाय् सरकारया गतिविधि न्ह्याइगु खँ नं धयादीगु दु । वय्कःया कथं राष्ट्रपति निर्वाचन न्ह्यः तक एमाले सरकारय् च्वने फइगु सम्भावना दु ।
LEAVE YOUR COMMENTS