पाटन हाईस्कुलया सछिदँया ज्याझ्वः

यल(नेपालभाषा टाइम्स)- थनया यलध्वाखाय् च्वंगु पाटन हाईस्कुलं छगू ज्याझ्वःया दथुइ शत वार्षिक ज्याझ्वः हंगु दु । वंगु शुक्रवाः अशोक हलय् स्कुल सछिदँ क्यंगु लसता ज्याझ्वः हंगु खः ।

विद्यालय व्यवस्थापन समितिया अध्यक्षलिसें यल महानगरपालिका ११ वडाअध्यक्ष अरोजकुमार खड्गीया सभापतित्वय् जूगु ज्याझ्वःया उलेज्या मूपाहां यल महानगर प्रमुख चिरिबाबु महर्जनं यानादीगु खः ।

यल मनपा प्रमुख महर्जनं विद्यालयं शत वार्षिकी ज्याझ्वः हंगु व थः नं ब्वति काये खंगुलिं लसता प्वंकादिसें भुखाचं क्षति जूगु ब्वनेकुथिया भवन निर्माणय् ग्वाहालि याःगु धासें जापान सरकारयात सुभाय् नं देछानादिल ।

नेपाःया निंतिं जापानी राजदूत किकुता युताकां जापान सरकारं नेपालय् भुखाचं क्षति जूगु निसः व पीगू ब्वनेकुथि पुनःनिर्माण याःगुलिइ उकी छगू पाटन हाईस्कुल नं जूगु जानकारी बियादिसें विद्यालयया ब्वँमिपिंसं बांलाक आखः ब्वनाः नेपाःया प्रेरक व्यक्ति जुइत इनाप यानादिल ।
प्रधानाध्यापक हरिश्चन्द्र गौलीं विद्यालय पुनःनिर्माणय् ग्वाहालि यानादीपिं सकसितं सुभाय् देछानादीगु खःसा ब्वँमिपिंसं थीथी सांस्कृतिक व सांगीतिक ज्याझ्वः न्ह्यब्वःगु खः ।

वि.सं. १९८१ सालय् तत्कालीन राणा प्रधानमन्त्री चन्द्र शम्शेरया पालय् स्थापना जूगु ब्वनेकुथिइ तगिं १२ गू तक अध्ययन याका वयाच्वंगु दुसा व्यवस्थापन, शिक्षा, मानविकी व कानून संकायय् नं अध्यापन याकावयाच्वंगु दु ।

नेपालभाषा टाइम्स

च्वमिया मेमेगु

• भ्वँतय् न्हापांखुसी नेपालभाषा साहित्य तःमुँज्या
• न्हूदँया लसताय् येँ–चौतारा मोटरसाइकल र्‍याली
• संस्कृतिविद् गणेशराम लाछिया ७५ क्वःगु बुन्हि हन
• लुँया भावय् न्हूगु कीर्तिमान
• नेपालय् न्ह्यानाच्वंगु जुजुवादी आन्दोलन, भारतीय हिन्दूत्वया लिच्वः