छगू हे थासय् झिंछम्ह कुमारि माजुया पुजा
येँ- येँ महानगर पालिका प्रमुख विद्यासुन्दर शाक्यं संस्कृति धइगु सुं जाति विशेष याकःचिया जक जुइमखु धयादीगु दु । संस्कृति धइगु सार्वजनिक सम्पदा जूगु जिकिर यासें वय्कलं कुमारिया थापना नं प्रथा मखु धयादीगु दु ।
ह्यू
मत मिसा पुचःया ग्वसालय् देय्या थीथी थासय् विराजमान झिंछम्ह कुमारि माजुया स्वक्वःखुसी जूगु तःजिगु पुजा क्वचायेका ज्याझ्वलय् नवासें वय्कलं उगु खँ धयादीगु खः ।
‘जीवित देवी कुमारिया थापना प्रथा मखु । थुकिं स्वनिगःया सांस्कृतिक, ऐतिहासिक, सामाजिक व धार्मिक पक्षया मौलिकता कुबियाच्वंगु दु’, येँ महानगर प्रमुख शाक्यं धयादिल, ‘थुकिया व्यवस्थापन व प्रवद्र्धनय् योजनाबद्ध धंगं ज्या यायेमाः ।’
जीवित देवी कुमारि संस्कृति व थुकिया गरिमा ल्यंकेत महानगरया नीति, कार्यक्रम व योजनाया विषययात मेमेगु पालिकातय्सं नं ध्यान बियाच्वंगु खँ कनादिसें वय्कलं थ्व सम्बन्धय् थःपिं न्यनेकने नं यानाच्वंगु दु धयादिल ।
सम्पदा संस्कृति छुं जाति विशेषया जक जुइमखु धासें वय्कलं थ्व दक्वं मंकाः सम्पत्ति जूगु व विविधताय् एकताया हे झीगु पहिचान जूगु वय्कलं धयादिल ।
ज्याझ्वलय् नवासें येँ महानगर उपप्रुमख हरिप्रभा खड्गी श्रेष्ठं धार्मिक व सांस्कृतिक पर्यटन स्वनिगःया तःधंगु सम्भावना जूगु खँ कनादिसें स्वनिगःया मौलिक सांस्कृतिक पहिचानया संरक्षण व व्यवस्थापन याये फत धाःसा पर्यटन प्रवद्र्धनय् नं तःधंगु योगदान जुइ धयादिल ।
ज्याझ्वलय् पन्ति नगरपालिकाया उपप्रमुख गीता बञ्जारां जात्रा, पर्व, संस्कृति, सम्पदाया प्रवद्र्धन व संवद्र्धनया निंतिं थःगु नगरं नं विशेष व्यवस्थापनय् बः बियाच्वंगु खँ कनादिसें नेपाः चाःहिउ वइपिं अप्वःथें विदेशी पर्यटकतय्सं जीवित देवी कुमारिया दर्शन यायेगु यानाच्वंगु खँ कनादिल ।
इन्द्रजात्रा व्यवस्थापन समितिया अध्यक्ष गौतमरत्न शाक्यं नं नुगःखँ प्वंकादीगु ज्याझ्वलय् येँ महानगर १२ वडाअध्यक्ष विकास डंगोल, १८ वडाअध्यक्ष न्हुछेकाजी महर्जन, २१ वडाअध्यक्ष उदय चुडामणि वज्राचार्य लगायतया जनप्रतिनिधितय् उपस्थिति दुगु खः ।
पुचःया ग्वसालय् देय्या थीथी थासय् विराजमान झिंछम्ह जीवित देवी कुमारिया छगू थाय् पचलि भैरवया प्रांगणय् जूगु खः ।
LEAVE YOUR COMMENTS