निःशुल्क शिक्षा विधेयक प्याब्सनयात अमान्य
येँ – निजी व आवासिय विद्यालय अर्गनाइजेशन नेपाल (प्याब्सनं) संसदं नकतिनि पारित याःगु ‘अनिवार्य तथा निःशुल्क शिक्षाको सम्बन्धमा व्यवस्था गर्न बनेको विधेयक, २०७५’ थःपिंत मान्य मजुइगु ख्याच्वः बिउगु दु । प्याब्सनं सोमवाः येँ छगू पत्रकार सम्मेलन यानाः संसदं पारित जूगु उगु विधेयक थःपिंत मान्य मजू धाःगु खः ।
थःपिंलिसे सहलह तकं मयासें पारित याःगु थ्व विधेयक तत्काल संशोधन मजुल धाःसा सरकार विरुद्ध कडा आन्दोनलय् वनेत थःपिं बाध्य जुइगु प्याब्सनया अध्यक्ष विजय सम्बाहाम्फें पत्रकार सम्मेलनय् धयादीगु दु ।
पत्रकार सम्मेलनय् न्ववासें साम्बाहाम्फें उगु विधेयक तत्काल संशोधन मजुल धाःसा विद्यालय सदाया निंतिं बन्द यायेत थःपिं बाध्य जुइगु पाखे सरकारया गम्भीर ध्यानाकर्षण जुइमाः धयादिल । प्रतिनिधि सभां पारित याःगु उगु विधेयकं निजी स्कुलतय्त मारय् लाइ धासें प्याब्सनं थ्व ख्याच्वः बिउगु दु ।
विधेयकय् दुथ्याकातःगु विद्यार्थीया ल्याः न्यासः जूसा १० प्रतिशत, च्यासः दुसा १२ प्रतिशत व व स्वयां अप्वः विद्यार्थी दत धाःसा १५ प्रतिशत विद्यार्थीयात निःशुल्क ब्वंकेमाः धकाः तयातःगु प्रावधान वैज्ञानिक व व्यवहारिक मजूगु दावी प्याब्सनं यानाच्वंगु दु ।
अथेहे निःशुल्क ब्वंकेमाःपिं विद्यार्थीया छनोट सम्बन्धित विद्यालयं यायेमदइगु व्यवस्थाया नं विरोध यायेमाःगु खँ अध्यक्ष सम्बाहाम्फे धयादीगु दु । वय्कलं धयादीगु दु, ‘राज्यं स्रोत धाःसा मबीगु, तर सेवा व सर्त जक तनेगु ज्या थःपिंत मान्य जुइमखु ।’अध्यक्ष सम्बाहाम्फें निःशुल्क शिक्षासम्बन्धी आरक्षणया व्यवस्था वयेधुंकाः थप आरक्षणया व्यवस्था यायेमजिउगु धासें सरकारया गम्भीर ध्यानाकर्षण याना धयादीगु खः ।
LEAVE YOUR COMMENTS