रेडक्रस दिवसय् हनुमानध्वाखाय् हिदान

येँ(नेपालभाषा टाइम्स)÷ नेपाल रेडक्रस सोसाइटीया स्थापना दिवस देय्न्यंकं थीथी ज्याझ्वः यानाः हनेगु झ्वलय् नेपाल रेडक्रस सोसाइटी गणबहाल उपशाखाया ग्वसालय् हिदान ज्याझ्वः जुल । नेपालय् रेडक्रस स्थापना जूगु दिं भदौ १९ यात रेडक्रस स्थापना दिवस हनेगु झ्वलय् उपशाखाया ग्वसालय् मंगलवाः हनुमानध्वाखाय् उगु हिदान ज्याझ्वः जूगु खः ।

नेपालय् रेडक्रस स्थापना जूगु ६१ दँ क्यंगु लसताय् जूगु हिदान ज्याझ्वलय् उपशाखाया आजीवन दुजःपिंत दसिपौ नं लःल्हाःगु खः । उगु इलय् गणबहाल उपशाखाया आजीवन दुजः जुयादीपिं डा. अनिता प्रधान, राजु नापि, रविन्द्रमुनि वज्राचार्यलिसें झिंखुम्हेसित रेडक्रसया केन्द्रीय सभापति प्रा. सुदर्शन नेपालं आजीवन सदस्यता दसिपौ लःल्हानादीगु खः ।