फुक्क हे कर्मचारी आन्दोलनय्

समायोजन विधेयक विरुद्धया आन्दोलन झन् तच्वया वन

येँ – सरकारं हःगु कर्मचारी समायोजन विधेयक विरुद्ध कर्मचारीतय्सं यानाच्वंगु आन्दोलन दीगु पलेसा झन् झन् तच्वया वंगु दु । थ्वहे झ्वलय् आः विधेयकया विरुद्ध प्राविधिक कर्मचारीत नं आन्दोलनय् कुहां वःगु दु । कृषि, पशु, वन, इन्जिनीयरिङ सेवाया कर्मचारीत नं आः आन्दोलनय् वःगु खः ।

कर्मचारीतय्सं थःपिनि वित्त विकासय् लिच्वः लाइ धासें थ्व विरोध शुरु याःगु खः । थ्व झ्वलय् कर्मचारी समायोजन विधेयक तत्काल भिंकेमाःगु माग यासें सरकारी चिकित्सकतय्सं नं म्हिगः स्वास्थ्य मन्त्रालय व जनसंख्या मन्त्रालय घेराउ याःगु दु । थःपिनिगु सेवा, सुविधा व बढुवा सम्बन्धी प्रावधान कटौती जुइ कथं अध्यादेश वःगु धासें सरकारी चिकित्सक संघ, नेपाल (गोदान) विधेयक भिंकेमाःगु माग यानाः आन्दोलनय् कुहां वःगु खः ।

न्हूगु वरियता
देय्या थीथी पदय् च्वंपिं पदाधिकारीतय्गु न्हूगु वरियता सरकारं पिकाःगु दु । थ्व कथं आः सचिव स्वयां महानगरया मेयर च्वय् लाःगु दु । मुख्यमन्त्रीया स्थान केन्द्रया मन्त्री सरह जूगु दु ।

चिकित्सकतय्सं सरकारं राज्यया गुगुं नं नीतिगत निर्णय प्रक्रियाय् चिकित्सकपिंत ब्वति मकायेकेगु कथं वःगु धासें थपिनि माग सम्बोधन मजुल धाःसा आकस्मिक बाहेक फुक्कं सेवा बन्द यानाः आन्दोलन यायेत थःपिं बाध्य जुइमाःगु धासें सरकारयात ख्याच्वः नं बियातःगु दु ।
थ्वहे झ्वलय् गुलिखे कर्मचारी संगठनतय्सं सरकारी विधेयक विरुद्ध सर्वोच्च अदालतय् मुद्दा तयेधुंकूगु खँ सीदुगु दु ।

लेखा समूहया कर्मचारीतय्सं वंगु पुस १७ गते हे सर्वोच्च अदालतय् दर्ता यायेधुंकूगु दुसा सामान्य प्रशासन समूहया कर्मचारीतय्सं म्हिगः आइतवाः सर्वोच्च अदालतय् मुद्दा दर्ता याःगु दु । अथेहे विधेयकयात कयाः शिक्षा कर्मचारी नं असन्तुष्टि प्वंकाच्वंगु दु । थ्व कर्मचारी प्राविधिक सेवाया सहसचिव तक हे प्रदेश व स्थानीय तहलय् समायोजन यायेगु व्यवस्थाया विरोध याना वयाच्वंगु दु ।

सरकारं संघीय निजामती सेवा ऐन, प्रदेश सेवा ऐन व स्थानीय निजामती सेवा ऐन महसे जबर्जस्ती कर्मचारी समायोजन यायेत स्वःगुलिं समस्या वःगु खँ जानकारतय्सं धाःगु दु । जानकारतय् कथं लिपा कानून दयेकाः वृत्ति विकास यायेगु धकाः उधारो खँ ल्हाःगुलिं समस्या वःगु खँ धाःगु दु ।