ने. सं. ११४३ तछलाथ्व त्रयोदशी -

विधेयक लित मकाःतले आन्दोलन

येँ – सरकारं विधेयक लित मकाल धाःसा आन्दोलनं निरन्तरता काइगु खँ नेवाः न्ह्यलुवा डा. महेशमान श्रेष्ठं धयादीगु दु । म्हिगः समाजवादी नेवाः संघं थाय्मदु दबुली याःगु सभाय् न्ववासें वय्कलं सरकारं विधेयक संशोधन यायेगु खँ हल धाःसा व मान्य जुइ मखु धासें आः विधेयक खारेज हे यायेमाः धयादिल ।

वय्कलं धयादिल, ‘विधेयक खारेज मयाःतले सरकारलिसे वार्ता नं जुइ फइ मखु ।’ गुथि संस्थानया पुलांम्ह अध्यक्ष पञ्चलाल मर्हजनं सरकारयात गुथि विधेयक हयेगु अधिकार मदु धासें संविधानया धारा ९० या ६ स गुथि विधेयक हयेगु अधिकार प्रदेश सरकारयात बियातःगु दावी यानादिल ।

आः तक गुथिया जग्गाय् सरकारी ज्याकू दयेकूगु मुआब्जा जक ४५ अर्ब स्वयां अप्वः मबिउगु खँ कँसें वय्कलं गुथिया विकास यायेगु खःसा सरकारं दकलय् न्हापां गुथियात पुलेमाःगु ध्यबा बीमाःगु माग यानादिल ।

विश्वय् ब्वये बहःगु सम्पदा म्हासे यायेगु कथं विधेयक वःगु धासें गुथिइ कर्मचारी भर्ना यानाः थः कार्यकर्ता पोसे यायेगु कथं विधेयक वःगु धासें आः नं गुथि संस्थानं थीथी थाय्या जग्गा बालं बीगु याना वयाच्वंगु व अज्याःगु ज्या यायेबलय् कमिसन नयेगु प्रवृत्ति हावी जुयाच्वंगु द्वपं नं वय्कलं बियादिल ।

अधिवक्ता जितेन्द्र वज्राचार्यं विधेयक नेवाःतय् सांस्कृतिक सम्पदायात म्हासे यायेगु कथं वःगु धासें तत्काल लित कायेमाःगु माग यानादिल । समाजवादी नेवाः संघया नायः सत्यनारायण डंगोलया सभापतित्वय् जूगु उगु ज्याझ्वलय् संघया सचिव राजाराम तण्डुकारं नं न्ववानादीगु खः ।

विधेयकया विरोधय् म्हिगः महाद्यः पार्वती दबुली म्येँ हालाः प्रदर्शन यायेगु ज्या जुल । राष्ट्रिय पहिचान संरक्षण संयुक्त संघर्ष समितिं उगु प्रदर्शन याःगु खः । ज्याझ्वलय् जनकवि दुर्गालाल श्रेष्ठया ‘लसय् हंगु विरोध’ म्येँचाःया थीथी म्ये हायेकाः विरोध याःगु खः । अथे हे म्हिगः १९ वडाय् नं स्वतस्फुर्त रुपं जुलुस पिहां वःगु दु । जुलुसं गुथि विधेयक विरुद्ध नारा थ्वयेकाः येँया थीथी लागा चाःहिउगु खः ।