गुम्बा थुनेत मनपाया माइकिङ

येँ (नेपालभाषा टाइम्स)- येँ महानगरपालिकाया वडा नं. १० या देवीनगरस्थित गुरुङतय्सं दयेकातःगु गुम्बा थुनेगु येँ मनपाया निर्णययात उपत्यका गुम्बा तमु सेवा समितिं विरोध याःगु दु । समितिं थःपिनि गुम्बा मथुनेत नं येँ मनपायात इनाप याःगु दु ।

उगु गुम्बा थुनेगु निर्णय तत्काल कार्यान्वयन याये मतेनि धकाः उच्च अदालत यलं अन्तरिम आदेश बिउसां नं मनपां धाःसा गुम्बा थुनेगु जुल धकाः थौंकन्हय् अन वयाः माइकिङ यानाच्वंगु दु । मनपाया माइकिङं यानाः गुम्बाथुवाःत आतंकित जुयाच्वंगु खँ धाःगु दु ।

यलया उच्च अदालतं गुम्बा मथुनेत आदेश बिउसां मनपां धाःसा सार्वजनिक जग्गा मिचे यानाः दयेका तःगु जुयाः थ्व गुम्बा थुने हे माः धयाच्वंगु दु । गुम्बां उगु लागाया सार्वजनिक जग्गा मिचे याःगु धासें स्थानीय मनूतय्सं तकं येँ मनपाय् उजुरी तयातःगु खँ धाःगु दु । मनपां आः थ्व गुम्बा थःपिंसं हे थुना छ्वयेत निर्देशन बिसें यदि मथुन धाःसा मनपां डोजर हयाः थुनेगु जुइ धकाः नं ख्याच्वः बिउगु दु ।

काठमाडौँ उपत्यका गुम्बा तमु सेवा समितिं म्हिगः छगू प्रेस विज्ञप्ति पित बिसें येँ महानगरपालिकायात बौद्ध धर्मालम्बीतय् आस्थाया केन्द्र जुयाच्वंगु गुम्बाया संरक्षण यायेत इनाप याःगु दु । समितिया अध्यक्ष टिकाराम गुरुङं हस्ताक्षर यानातःगु विज्ञप्तिइ धयातःगु, “विसं २०६६ जेठ २१ गते बुद्ध धर्मप्रति आस्था तइपिं गुरुङ समुदायया मनूत बुद्ध धर्मया ज्ञान, उपदेश, प्रवचन बीगु ताः तयाः संस्कृति, पर्यटन तथा नागरिक उड्डयन मन्त्रालयअन्तर्गतया बौद्ध दर्शन प्रवद्र्धन तथा गुम्बा विकास समितिइ समेत दर्ता यानाः काठमाडौँ उपत्यका गुम्बा तमु सेवा समिति सञ्चालन जुयाच्वंगु खः ।”

गुम्बा दयेके न्ह्यः वडा कार्यालयया सिफारिसय् जग्गा प्रमाणित यानाः वडाया हे डिजाइनय् गुम्बा निर्माण यानागु खँ नं समितिं धाःगु दु । नापं गुम्बा दयेकेत तत्कालिन वडा कार्यालयपाखें नं बजेट विनियोजन जूगु खँ धाःगु दु । अथे हे उगु गुम्बा दयेकेत आपालं बौद्ध धर्माबलम्बीत लिसें पर्यटन मन्त्रालय, शहरी विकास तथा भवन विभाग, जिल्ला समन्वय समिति काठमाडौँ, बौद्ध दर्शन प्रवद्र्धन तथा गुम्बा विकास समिति, संसदीय विकास कोषलगायत थीथी सरकारी संस्थापाखें आर्थिक ग्वाहालि मुंकागु खँ नं धाःगु दु ।

थज्याःगु अवस्थाय् नं उगु गुम्बा थुनेगु धकाः मनपां माइकिङ यानाच्वंगुलिं थःपिनि गम्भीर ध्यानाकर्षण जूगु खँ समितिं धाःगु दु । मनपां धर्म, संस्कृतिया रक्षा यायेगु धयाच्वंगु इलय् नं गुम्बा थुनेत्यंगु धाःसा पाय्छि मजूगु खँ नं विज्ञप्तिइ धयातःगु दु ।

येँ मनपां छुं ई न्ह्यः राप्रपाया ज्याकू थुनेगु धकाः डोजर समेत हःगु खःसां उच्च अदालत यलं आःयात थ्व छेँ थुने मतेनि धकाः अन्तरिम आदेश बिउगु खःसा वयां लिपा मनपा लिचिउगु खः । येँया थाय्मरुइ च्वंगु त्वाःछेँ थुनेगु मनपाया कुतः विरुद्ध नं अदालतं आदेश जारी याःगु खः ।