लाखे प्याखं ल्यंकेत कासा

मध्यविन्दु(रासस)- नवलपरासी (बर्दघाट सुस्तापूर्व)य् लाखे प्याखं संरक्षणया निंतिं जिल्लाय् न्हापांखुसी जूगु लाखे प्याखं क्वचाःगु दु । कावासोती नगरपालिकाया दुनेया न्यागू गुथिं ब्वति काःगु कासाय् श्री गणेश भीमसेन नेवाः गुथि कावासोती–१७ गोछडा न्हाप, भीमसेन कालिका नेवाः गुथि कावासोती–१४ त्रिभुवनटार लिउ व शिखा नेवाः गुथि कावासोती ३ लियांलिउ लाःगु दु ।

खुल्ला लाखे प्याखं कासा ग्वसाः ग्वयाः जिल्ला दुने च्वंगु गुथिं लाखे प्याखं न्ह्यब्वःगु खः । ख्वाःपाः पुनाः लाखे जूपिं प्याखं हुलाच्वंगु खःसा स्वकुमिपिं नं म्वःम्वः हे दुगु खः । कावासोती लागाय् च्वना वयाच्वंपिं नेवाः समुदायं संस्कार, संस्कृति संरक्षणया निंतिं धासें जिल्लास्तरीय लाखे प्याखं कासा ग्वसाः ग्वःगु खः ।

नवलपुर न्यंकंया नेवाः गुथिपाखें कासामिपिं दुथ्याकाः लाखे प्याखं कासा ग्वसाः ग्वयागु भीमसेन कालिका नेवाः गुथिया नायः मोहनकुमार श्रेष्ठं कनादिल । नेवाः समुदाय दुने लोप जुया वनाच्वंगु मौलिक संस्कृति व परम्परागत रुपय् हना वयाच्वंगु लाखे प्याखं पर्व ल्यंकेगु निंतिं लाखे प्याखं कासा हे यानाः संरक्षण यायेगु ज्याय् न्ह्यचिलाच्वनागु वय्कलं कनादिल ।

‘बाजंया तालय् न्ह्यब्वइगु लाखे प्याखं स्वयाः स्वकुमिपिंसं नं न्ह्यइपुकूगु दु’ वय्कलं धयादिल, ‘थीथी नेवाः समुदाया लाखे प्रस्तुति जिल्लाय् न्हापांखुुसी छक्वलं छगू हे थासय् स्वयेगु ह्वःताः सकसितं चूलाःगु दु ।’

लाखे प्याखनं नेवाः समुदायया म्हसीका व संस्कार, संस्कृति पिब्वयेगु ज्या याइ । लाखे प्याखं अन्तर्गत कृष्ण प्रस्तुति, चटकीनिसें कथि प्याखंतकया प्रस्तुति न्ह्यब्वःगु नायः श्रेष्ठं कनादिल । थुपिं प्रस्तुतिइ नेवाः उत्कृष्ट संस्कृति मालेगु ज्या जूगु खः ।

‘लाखे प्याखं संरक्षण व संवद्र्धन यायेगु उद्देश्यं थीथी नसाज्वलं मेलालिसें लाखे प्याखं कासा यानागु खः’ वय्कलं धयादिल । थन नागपंचमिनिसें कृष्णा अस्तमिया कन्हय्तक न्हियान्हिथं लाखे प्याखं क्यना वयाच्वंगु दु ।