सम्पदा सुचुकुचुया ज्याय् नेपाली सेना

येँ(नेपालभाषा टाइम्स)- साउन भदौया महिना । उकिसनं न्हियान्हिथं वा वया च्वनीगु ई । मदिक्क वा वयाच्वनीगुलिं सर्वसाधारण छेँलिसें द्यःपिं बिज्याइगु देगःतक नं घाँय् बुया वयाः वथं गयाच्वनी । गुकिं यानाः देगः फोहर खने दयाच्वनी । उलि जक मखु लिपा वनाः देगलय् बुया वःगु घासं देगःया संरचनाय् तकं क्षति याइगु सम्भावना दु । उकिं येँय् साउन भदौ महिनाय् खास यानाः देगः देगलय् बुया वयाच्वनीगु अज्याःगु घाँय् पुनाः छ्वयेगु व सुचुकुचु यायेगु परम्परा हे दयाच्वंगु दु ।

देगः देगलय् थुकथं बुया वयाच्वनीगु घाँय् पुइगु व सुचुकुचु यायेगु ज्या आः वयाः नेपाली सेना नं सक्रिय रुपं न्ह्यचिला वयाच्वंगु दु । थ्व झ्वलय् वंगु शनिवाः येँया ऐतिहासिक जोशी देगः (जैसीदेगः) व जःखःया लागा सुचुकुचु यायेगु ज्याय् हनुमानध्वाखास्थित शार्दुल जंग गुल्मया जवात नं सरिक जूगु खः ।

स्थानीय जैसी देवल युथ क्लबं ग्वसाः ग्वःगु देगः सुचुकुचु यायेगु ज्याय् क्लबया हे इनापकथं गुल्मया सैनिक जवानतसें ब्वति काःगु खः । गुल्मया गुल्मपति सेनानी पूर्ण प्रजापतियाकथं जोशी देगः सुचुकुचु यायेगु ज्या् गुल्मया नीन्याम्ह जवान सहभागि जूगु खः ।

लुमंकेबहजू, वि.सं. २०७२ सालया भुखाचं पूर्ण रुपं क्षति जूगु जोशी देगः पुनःनिर्माण यानाः न्हूगु दयेकूगु खः । वंगु साउन २७ गते शनिवाः येँ महानगरपालिका २३ वडाया इनापय् २३ वडा दुने च्वंगु थीथी सम्पदा क्षेत्रया सुचुकुचु यायेगु ज्याय् नं गुल्मया जवानत सहभागि जूगु खः ।
गुल्मपति सेनानी प्रजापतियाकथं येँया मेमेगु थासं नं यदि सांस्कृतिक सम्पदा, स्मारकत सुचुकुचुया निंतिं इनाप यात धाःसा अन नं जवानत खटे याये फइ । ‘स्थानीय संस्था, स्थानीयवासीं ग्वसाः ग्वइगु सार्वजनिक महत्वया ज्याझ्वलय् थःपिं नं ल्हाः माः हनाः न्ह्याः वनेत न्ह्याबलें तयार दु,’ सेनानी प्रजापतिं धयादिल ।

लुमंकेबहजू, येँया सार्वजकि देगः, सम्पदा अझ विशेष यानाः स्वयम्भू लागाय् असार–साउन महिनाय् घाँय् पुयाः सुचुकुचु यायेत गुथिय तकं व्यवस्था यानातःगु दु ।