चाबहीया दिप संरक्षण यायेगुली मनपाय् नं विवाद

येँ (नेपालभाषा टाइम्स)- येँया चाबहिली विवादय् लानाच्वंगु दिप छ्यले बीगु वा मबीगु धइगु खँयात कयाः येँ मनपा दुने हे मत विभाजन जूगु दु । स्थानीय शाक्य, महर्जन आदि समुदायं छ्यलेगु यानाच्वंगु वडा नं. ७ स्थित उगु दिप छ्यले बी मखु धकाः अन लिपा च्वं वःपिं आप्रवासीतय्सं विरोध यायेवं स्थानीयवासीलिसे ल्वापु पिहां वःगु खः ।

आः अन दिप छ्यले बिउसां मबिउसां दिपया संरक्षण यायेमाः धकाः महानगरपालिकां बजेट तयेवं वडा नं. ७ या वडा अध्यक्ष विमल कुमार होडां उकिया विरोध याःगु खः । वडा ७ या अध्यक्ष होडा अन दिप तयेके मजिउ धइगु पक्षय् वनेधुंकूगु दुसा आः अन संरक्षण तकं याये मजिउ धइगु लाइनय् दुगु खँ सीदुगु दु ।

उकिं वडापाखें आः दिपया संरक्षणय् खास हे ध्यान बियाच्वंगु मदु । अथे खःसां उपमेयर सुनिता डंगोलं उगु दिप संरक्षणया लागिं धकाः बजेटया व्यवस्था यायेवं वडा अध्यक्ष होडां थःगु वडाय् थःके हे मन्यँसे छाय् बजेट तयागु धकाः न्ह्यसः तयादीगु खः । लिसलय् उपमेयर डंगोलं वडा अध्यक्षतय्सं व जिगु वडा, थ्व जिगु वडा धकाः धायेगु याना हल धाःसा मेयर व उपमेयरया वडा चाहिँ गन ले धकाः न्ह्यसः तयादीगु खः । उकिं वडा अध्यक्षतय्सं जिगु वडा धकाः धाये मदइगु खँ नं उपमेयर डंगोलं यानादिल ।

चाबहीया दिप विशेष यानाः ५ वडाया स्थानीयवासीया नं सी उइगु खः । उकिं उगु दिप संरक्षण जुइमाः धकाः ५ वडाया स्थानीयवासीतयय्सं नं माग याना हःगु दु । तर उगु दिपया जःखः छेँ दनाः च्वं वःपिं आप्रवासीतय्सं धाःसा अन संरक्षण जक याः वःसां नं विरोध यायेगु यानाच्वंगु दु ।
अथे हे येँ मनपां विकास निर्माणया ज्या याइबलय् वडां निथाय् १३ प्रतिशत भ्याट पुले मालीगु अवस्था जुयाच्वंगुलिं आः छथाय्या भ्याट लित बीगु धकाः नं निर्णय याःगु दु ।

अथे हे विसं २०६४ साल स्वयां न्ह्यः करार व अस्थायी नियुक्त जुयाः ज्या यानाच्वंपिं कर्मचारीतय्त आः सामान्य जाँच कयाः स्थायी नियुक्ति याना छ्वयेगु धकाः नं निर्णय याःगु दु ।

थ्वहे झ्वलय् बालाजु पार्कया सांस्कृतिक सम्पदा बचे यायेमाः धकाः स्थानीयवासीतय्सं यानाच्वंगु आन्दोलनयात सम्बोधन यासें मनपां अनया सास्कृतिक सम्पदा संरक्षण यायेगु धकाः नं सहमति याःगु दु ।