ल्वहंहितिया अध्ययन याइगु
येँ(नेपालभाषा टाइम्स)- येँ देय्या सभ्यताया रुपय् दयाच्वंगु ल्वहंहिति प्रणाली सहरी विकासया श्रृंखलालिसे स्वानाच्वंगु दु । स्वनिगःया हे सभ्यताया रुपय् दयाच्वंगु थ्व हे ल्वहंहितिया अध्ययन याइगु जूगु दु । येँ महानगरपालिकां थनया ल्वहंहितिया अध्ययन यायेत्यंगु खः । येँ महानगरपालिकां महानगर लागाया ल्वहंहितिलिसें भूमिगत लः पुनःस्थानापनाया अध्ययन यायेत्यंगु खः ।
उकिया निंतिं येँ महानगरपालिकां इन्जिनियरिङ अध्ययन संस्थान पूल्चोक क्याम्पसलिसे सहकार्य याइगु जूगु दु । उगु सहकार्यया निंतिं येँ महानगरपालिकां क्याम्पसलिसे छगू सम्झौता नं याःगु दु । सम्झौता पती येँ महानगरपालिकाया प्रमुख प्रशासकीय अधिकृत वसन्त अधिकारी व क्याम्पस प्रमुख डा. इन्द्रप्रसाद आचार्यं ल्हाःचिं तयादीगु खः ।
सहरयात मानव वस्तीया रुपय् विकास यायेत व बसोबास योग्य सहरया रुपय् कायम यानातयेत लःया प्राकृतिक स्रोत व उकिया पुनःभरणया स्थानीय विधि, प्रक्रियायात वैज्ञानिक रुपं अध्ययन यायेमाःगु आवश्यकतायात महसुस यानाः महानगरं थुकथंया योजना न्ह्यःने हःगु खः । थ्व आवश्यकतायात कार्यान्वयन यायेगु ल्याखं महानगरं क्याम्पसलिसे सहकार्यया निंतिं सम्झौता यानागु प्रमुख प्रशासकीय अधिकृत अधिकारीं कनादिल । क्याम्पस प्रमुख आचार्यं थुकथंया निगू पक्षया सम्झौतां मानव बसोबासया निंतिं महत्वपूर्ण आधारया बारे सीकेत व ल्वहंहितिया तथ्यांक प्राप्त जुइगु विश्वास प्वंकादीगु दु ।
सम्झौताकथं विज्ञतय्पाखें स्वनिगःया ल्वहंहितिया प्रणाली व भूमिगत लःया सतहसम्बन्धी घटनाक्रमया अध्ययन याइ । लिसें जलविज्ञान अवस्था बारे सीकेगु ल्याखं जुइगु अध्ययन विश्लेषणय् निगुलिं पक्षया सहभागिता दइ ।
अध्ययनय् ल्वहंहितिया निर्माण, उपयोग, संरक्षण सम्बन्धी स्थानीय ज्ञान, सीप नापं ल्वहंहितिया वर्तमान अवस्था, प्रणाली, धार्मिक, सामाजिक, परम्परागत रैथानेया सौन्दर्यताया पक्षयात कःघाइगु जूगु दु । थुकथं हे प्राचीन प्रणालीलिसे त्वनेगु लःया आधुनिक पाइप लाइनया विस्तारया अध्ययन नापं आधुनिक विकासलिसे परम्परागत ल्वहंहिति प्रणालीया संरक्षणया निंतिं योजना व विकासया बारे नं अध्ययन याइगु जूगु दु ।
LEAVE YOUR COMMENTS