ने. सं. ११४४ कौलाथ्व दशमी - स्याक्वत्याक्व

जापानय् न्हापांखुसी नेवाः नसा नखः

येँ – जापानीजतय् दथुइ नेवाः नसा ज्वलं व संस्कृतिया प्रवद्र्धन यायेगु ल्याखं जापानय् न्हापांखुसी नेवाः नसा नखः–२०१८ जुइत्यंगु दु । वल्र्ड नेवाः अर्गनाइजेशन जापानया ग्वसालय् थ्व हे वइगु जनवरी २८ कुन्हु उगु ज्याझ्वः राजधानी टोकियोस्थित इकेगामि काइकान हलय् जुइ । नेपाल संवत् ११३८ न्हूदँया लसताय् जुइत्यंगु ज्याझ्वलय् उल्लेख्य रुपं जापानीजतय् सहभागिता दइगु नापं जापानीतय् दथुइ नेवाः नसा व संस्कृतिया छाप त्वःतेत सफल जुइगु ग्वसाः खलःया प्रतिनिधि मासाहिरो यामाकावा (ब्यांचा दाइ) नं कनादीगु दु ।

ज्याझ्वलय् थीथी नेवाः सांस्कृतिक बाजंया नापं तिसावसःया ब्वज्या जुइगु व नेपाःया थीथी जात्राया बारे प्रत्यक्ष रुपं जानकारी काये फइगु सांस्कृतिक ज्याझ्वःया संयोजक सकुल प्रजापतिं कनादीगु दु । कुमारि, धिमे व लाखे प्याखं नापं जापानी कलाकार उुको ओकामोतों चचा प्याखं व आकिाको कुमेया नं थःगु प्रतिभा न्ह्यब्वइगु जूगु दु । ज्याझ्वलय् वइपिं पाहांपिंत न्हापां समय्बजिपाखें लसकुस यायेगु व नेवाः नसा ज्वलनय् छ्याला, बुल्ला, तःखाः, मी क्वाः, छ्वंक्वाः, न्ह्यपु आदि परिकारलिसें थीथी नेवाः मरिचरिया नं सवाः काये खनीगु ज्याझ्वःया संयोजक नरेन्द्रकुमार शाक्यं धयादीगु दु ।

ज्याझ्वलय् येँयाः हाथ्वँ द्यः व समय् द्वँ जापानीजय् निंतिं मुख्य आकर्षण जुइ फइगु विश्वास संस्थाया जनकराज शाक्यं प्वंकादीगु दु । जापानीजतय्त नेपाःया बारे नापं नेवाः नसा ज्वलंया बारे जानकारी बीगु ल्याखं विशेष स्टलया व्यवस्था व नेपाः भ्रमण बारे नं जानकारी बीगु उद्देश्य दुगु पर्यटक विज्ञ कृष्णवदन जोशीं कनादीगु दु । डब्लयुएनओ जापान च्याप्टरया फेसबुक पेजपाखें ज्याझ्वःया नापं सहभागितलिसें न्यनेकनेया प्रत्यक्ष प्रशारण जीएमटी इन्टरनेशनलं याइगु जूगु दु ।