रामवीर अझं गौतमया पक्षय्

येँ- नेता वामदेव गौतमया लागिं थःगु क्षेत्र त्वःतेत तयार दु धकाः घोषणा समेत यानादीम्ह नेकपाया सांसद रामवीर मानन्धरं नं पार्टीपाखें थःगु राजीनामा अस्वीकार याःसां वामदेव गौतमयात प्रतिनिधि सभाय् हयेमाः धइगु बिचाः धाःसा त्याग यानामदीगु खँ सूत्रं धाःगु दु । वय्कलं थम्हं नं पार्टी एकता लिपा निगुलिं पार्टीपाखें वःपिं नेतातय्त छधी याना तयेगु लागिं गौतमयात प्रतिनिधिसभाय् हयेमाःगु बिचाः प्वंकादीगु दु । छगू अनलाइन पत्रिकायात बियादीगु अन्तर्वार्ताय् वय्कलं पार्टी एकतायात बल्लाकेगु लागिं थम्हं राजीनामा बियागु खः धकाः स्पष्ट यानादीगु दु ।

सांसद मानन्धरं थ्व राजीनामा बियाः प्रधानमन्त्री केपी ओलीयात कमजोर यायेत स्वःगु धकाः नं आलोचना जुयाच्वंगु दु । वय्कलं बियादीगु राजीनामायात पार्टीं अस्वीकार याःसां नं आः स्थानीय राजनीतिइ सांसद मानन्धरया अवस्था धाःसा कमजोर जूवंगु खँ उगु क्षेत्रया पार्टी कमिटीया कार्यकर्तातय्सं धाःगु दु ।