दुर्गालालया म्येँ दुर्गालालयात हे देछा

येँ – नेपालभाषायात च्वन्ह्याकेगु ज्याय् संगीतया माध्यमं तःजिगु योगदान यानादीम्ह लोकंह्वाःम्हजनकवि दुर्गालाल श्रेष्ठयात वय्कलं हे रचना यानादीगु संगीतवद्ध म्येँ देछानाः सम्मान याइगु जूगु दु । जनकवि दुर्गालाल श्रेष्ठं वि.सं. २०१२÷०१३ सालंनिसें रचना यानाः गायक योगेश वैद्यं हालादीगु पुलांगु म्येँयात आः हानं न्हू कथं परिमार्जित रुपय् हालाः पिथंगु निचाः म्येँचाः वय्कःयात देछायेत्यंगु खः । फर्गटन मेलोडिज् व रीता एट हर बेष्ट नां तयाः थ्व एल्बम पिथंगु खः ।

न्हापा म्येँ रेकर्ड यायेगु चलन व प्रविधि मदुगु इलय् हालातःगु उगु म्येँत ताःई तक तनाच्वंगु खःसा आः उकियात वहे लसय् हानं योगेश वैद्यं तुं हालाः एल्बमया रुप बिउगु खः । थुकी मिसा सः धाःसा गायिका रीता महर्जनं बियादीगु दु ।थ्वहे वइगु शनिवाः येँया वीभा कन्भेन्सन एण्ड इभेन्ट टेकुइ श्री सीतामां स्मृति संगीतया ग्वसालय् जुइगु ज्याझ्वलय् रचनाकार दुर्गालाल श्रेष्ठयात ससम्मान सांगीतिक देछा लःल्हाइगु ग्वसाः दु ।

गायक प्रेमध्वज प्रधान मूपाहां कथं झाइगु उगु ज्याझ्वलय् नेपाल संगीत तथा नाट्य प्रज्ञा प्रतिष्ठानया कुलपति सरुभक्त श्रेष्ठ, उपकुलपति शम्भूजीत बास्कोटा, वरिष्ठ गीतकारपिं किरण खरेल, रत्नशमशेर थापा, यादव खरेल, कालिप्रसाद रिजाल, कृष्णहरि बराल, शिक्षाविद् प्रा. सुवर्ण शाक्यपिंसं नेवाः संगीत व रचना बारे न्ववानादी ।

नेपालभाषा टाइम्स

च्वमिया मेमेगु

• झीगु सःया निसःब्व थ्यन, निम्ह संचारकःमि सम्मानित
• बालेनया जय जयकार सुनियोजित धइगु पुष्टि
• यँयाःयात झःझः धायेकीम्ह पुलुकिसि
• कन्हय् महाकविया किपा बग्गीइ तयाः चाःहीकीगु
• राजदूतया खँय् नेकां–एमाले ल्वापु