युनेस्को अध्ययनया लिच्वः – ‘शिक्षा बहुभाषिक हे जुइमाः’

येँ (नेपालभाषा टाइम्स)- मस्तय् सयेकेज्याया गुणस्तर व प्रभावकारिता थकायेगु खःसा बहुभाषिक माध्यमं स्यनेकने यायेमाःगु खँ छगू अध्ययनपाखें सीदुगु दु । थुकिया लागिं मस्तय्त बहुभाषिक विधिं स्यनेकने याइगु नीति हयेगु सुझाव नं अध्ययनं बिउगु दु ।

‘नेपालय् मस्तय् सिकाइ उपलब्धिइ भाषा व भाषा नीतिया प्रभावसम्बन्धी बुझाइ’ धइगु शीर्षकय् नेपाःया शिक्षा तथा मानव स्रोत विकास केन्द्र, भाषा आयोग, युनेस्को व ब्रिटिश काउन्सिलया सहकार्यय् युनिसेफ नेपालं याःगु अध्ययनं थ्व ठहर याःगु खः ।

लिसें आः तक नेपालय् बहुभाषिक माध्यमया सिकाइबारे छुं हे एकरुप नीति मदुगुलिं ब्वनेकुथि, कार्यस्थल व समाजयात तकं थुकिया बारे स्पष्ट जुइक स्यनेमाःगु खँ नं अध्ययनं धाःगु दु ।

“नेपालय् फुक्क हे स्कुलय्बहुभाषिकताया आधारय् स्यनेगु ज्या जुइमाः । थुकी अवरोध वा समस्या मजुसे सकारात्मक सोच जुइ” अध्ययनया मूतिइ धयातःगु दु– “सिकाइस्तरया मूल्याङ्कन नं छगू हे भाषाया आधारय् मजुसे बहुभाषिकताया हे आधारय् जुइमाः ।”

संविधानतः फुक्क मांभाय्यात राष्ट्रभाषा धयातःसां व्यवहारय् फुक्क भाषायात समान मान्यता मदुगु खँ न्ह्यथँसें अध्ययन प्रतिवेदनं फुक्क भाषाया सवलीकरणया लागि सरकारया प्रतिबद्धता समान रुपं व्यक्त जुइमाःगु खँ नं न्ह्यथंगु दु ।

डा. प्रेमप्रसाद पौड्याल व डा ट्रयासी कोष्टीया नेतृत्वय् जूगु उगु अध्ययनं बहुभाषाया माध्यमं ब्वंकेगु ज्यायात समस्या वा चुनौती तायेके मजिउगु खँ नं धयातःगु दु । मस्तय्त उमिसं न्ववाइगु हे भासं ब्वंकल धाःसा ब्वनेकुथिइ नं सहज जुयाः यक्व अन्तक्र्रिया जुइगु व क्यनेकनेया आधार नं क्वातुइगु खँ अध्ययनय् धयातःगु दु ।

अध्ययन प्रतिवेदन सार्वजनिक यायेत म्हिगः जूगु ज्याझ्वलय् शिक्षा, विज्ञान तथा प्रविधि राज्यमन्त्री प्रमिला कुमारीं अध्ययनयात शिक्षाया गुणस्तर थकायेगु ताः तयाः नीतिगत हिउपाः हयेगु खँ कनादिल । मन्त्रालयया सचिव रामकृष्ण सुवेदीं बहुभाषिक सिकाइ नीतियात चरणबद्ध रुपं कार्यान्वयनय् यंके फइगु खँ कनादिल । बहुभाषी नेपालय् १२४ गू मातृभाषा दुसा करिब ४५ प्रतिशत खस नेपाली भाषी दु ।

सम्बन्धित बुखँ

LEAVE YOUR COMMENTS