ने. सं. ११४३ चौलाथ्व पारू -

जग्गा दुसा महानगरपालिकां भवन निर्माण यानाबी

येँ – येँ महानगरपालिकाया प्रमुख विद्यासुन्दर शाक्यं गुगुं नं गुथि वा खलःया थःगु हे जग्गा दुसा महानगरपालिकां अन सांस्कृतिक भवन निर्माण यानाबीगु खँ धयादीगु दु । वय्कलं येँया सांस्कृतिक, सम्पदात संरक्षण यायेगु झ्वलय् गुगुं नं गुथि, खलः, पुचःया थःगु हे जग्गा दु धइगु खःसा अन महानगरपालिकां सांस्कृतिक भवन दयेका बीगु जुइ धयादीगु खः ।

येँ महानगर प्रमुख शाक्यं येँ मपा २१ वडास्थित तःबहालय् पुनःनिर्माण सम्पन्न जूगु गणेद्यःलिसें थीथी देवीदेवता व तुंफःया उलेज्या यायेगु झ्वलय् धयादीगु खः ।
ज्याझ्वलय् नवासें येँ महानगर प्रमुख शाक्यं महानगरपालिकाया थुकथंया ग्वाहालिं यानाः येँया गुलिखे गुथि खलःया दुजः, गुथ्याःत जानाः मंकाःकथं जग्गा न्यायेगु यानाहःगु धासें अज्याःगु थासय् महानगरपालिकां सांस्कृतिक प्रयोजनया निंतिं भवन नं दयेका बिया वयाच्वनागु दु धयादिल ।

‘न्हापा न्हापा गुथितय्सं थःपिनिगु हे पहलय् याइगु ज्याखँत आः वयाः स्थानीय सरकारं जिम्मा कयाः यायेगु याना वयाच्वनागु दु’, महानगर प्रमुख शाक्यं धयादिल, ‘थन (महानगर)या सांस्कृतिक सम्पदात संरक्षणयात येँ महानगरपालिकां अपनत्व ग्रहण यानाः हे थुकथंया ज्या न्ह्याकूगु खः ।’

येँ महानगरं न्ह्याका वयाच्वंगु थुकथंया सांस्कृतिक सम्पदा संरक्षणया ज्याय् बागमति प्रदेश सरकारं नं ग्वाहालि याना वयाच्वंगु खँ कनादिसें वय्कलं चालु आर्थिक दँय् येँय् सांस्कृतिक वाद्यवादनया ज्वलंत न्यायेत प्रदेश सरकारं स्वंगू करोड बजेट विनियोजन नं याःगु दु धयादिल । प्रदेश सरकारया थुकथंया सहकार्यपाखें येँ महानगरया सांस्कृतिक सम्पदा संरक्षणय् थप योगदान जू वनीगु वय्कःया धापू दु ।

थ्व हे झ्वलय् महानगरपालिकां यायेत्यंगु गुलिखे ज्यायात अदालतं पना बिउगु खँय् वय्कलं दुःखतकं प्वंकादिल । यदि अदालतं उकथं पना मबिउगु खःसा थौं २१ वडाया लगं त्वालय् छगू आकर्षक पार्क निर्माण जुइधुंकीगु खइ धासें लगं चुकयात असं, वंघः थें हे आकर्षक चोक दयेकेगु इच्छा दुगु वय्कलं धयादिल ।

लगं स्थानीयवासीया निंतिं दयेकेत्यनागु पार्कयात छम्हेसिया उजुरीया लिधंसाय् उकियात पना बिउगु व आः वयाः कोरोनाया कारण क्यनाः मुद्दाया पेशी तकं रोके यानातःगु धासें वय्कलं दुःख नं प्वंकादिल ।