विद्यार्थी युनियनपाखें किपूया जनप्रतिनिधियात भिंतुना देछा

किपू- नेवाः विद्यार्थी युनियनं किपू नगरपालिकाया नवनिर्वाचित जनप्रतिनिधियात भिंतुना बिउगु दु । युनियनं किपू नगरया प्रमुख, उपप्रयात नाप लानाः भिंतुना बिउगु खः ।

युनियनया नायः रिदेन महर्जन, छ्याञ्जे प्रशान्त डंगोल, दुजःपिं मनिष मानव, विक्कीराज महर्जन, रुपा शाहीलिसें आरआर क्याम्पसय् नेपालभाषा विषयया शिक्षक प्रा. डा. चन्द्रमान वज्राचार्य लगायतं नवनिर्वाचित प्रमुख राजकुमार नकःमि व उपप्रमुख शुभलक्ष्मी शाक्य (सुनिता)यात कार्यकाल सफलताया कामना यासें भिंतुना बियादीगु खः ।

उगु इलय् युनियनया नायः महर्जनं किपूया नवनिर्वाचित जनप्रतिनिधिं थःपिंसं न्ह्याकाच्वनागु अभियानय् आपालं संघर्ष यायेमाःगु खँ कनादीगु खः । लिसें वय्कलं क्याम्पसय् नेपालभाषा विषय अध्यापनया निंतिं आपालं हाथ्यालिसें अवसर नं दुगु खँ कनादिसें नेपालभाषा संरक्षण व संद्धर्वनया निंतिं योगदान बीत इनाप यानादिल ।

युनियनया हे सक्रियताय् क्याम्पसय् बि.ए. तगिमय् नेपालभाषा विषय हाकनं अध्यापन याकेत ताःलाःगु खःसा वंगु दँनिसें न्हूगु व्यवस्थापनकथं नेपालभाषा कक्षा नं संचालन यायेत ताःलाःगु खः ।

सम्बन्धित बुखँ

LEAVE YOUR COMMENTS