ने. सं. ११४६ बछलागा सप्तमी -

नेवाः विश्वविद्यालय बारे मेयर साहलिसे खँल्हाबल्हा

येँ (नेपालभाषा टाइम्स)- येँ महा नगरपालिकापाखें नेवाः विश्वविद्यालय चायेकेगु धकाः हःगु प्रस्तावयात कयाः नेवाः अभियन्तातय्सं म्हिगः येँ मनपाया मेयर बालेन साहलिसे खँल्हाबल्हा याःगु दु । शिक्षा क्षेत्रय् सक्रिय नेवाः अभियन्तातय्सं म्हिगः मेयर साहयात नापलासें नेवाः विश्वविद्यालय चायेकेगु मनपाया ग्वसाःयात थःपिंसं माःगु ग्वाहालि यायेगु धासें थुकिया लागिं माःगु पलाः न्ह्याका हे छ्वयेत इनाप याःगु खः ।

उगु इलय् मेयर साहं थ्व ज्यायात न्ह्यःने न्ह्याकेत आः वइगु असारं बजेट समेत फ्यायेगु बचं बियादीगु खः । लिसें थ्व विषययात मूर्त रुप बीगु लागिं मनपां विज्ञत तयाः छगू समिति हे गठन यानाः ठोस प्रस्ताव तयार यायेगु खँ नं कनादिल ।

म्हिगः मनपाया प्रवक्ता नविन मानन्धरया पहलय् नेवाः वस्ती नेवाः स्कुलया संयोजक दिपक तुलाधर, नेपालभाषा मंकाः खलःया राजा शाक्य व नेवाः स्टुडेन्ट युनियनया रिदेन महर्जनपिंसं मेयर साह नापलाःगु खः ।