छवाःयंकंया अभिधम्म पाठ क्वचाल

येँ(नेपालभाषा टाइम्स)- थनया धर्मकीर्ति विहारय् छवाःयंकं न्ह्यानाच्वंगु अभिधम्म पाठ ज्याझ्वः क्वचाःगु दु । श्रद्धेय भिक्षुणी धम्मावती गुरुमांया ९० दँ बुन्हिया लसताय् वंगु बुधवाःनिसें विहारय् अभिधम्म पाठ ज्याझ्वः न्ह्याःगु खः ।

धर्मकीर्ति विहारया प्रमुखलिसें अग्गमहागन्थवाचक सासनधज धम्माचरिय भाषाथुवाः पं. धम्मावति गुरुमांया ९० दँ बुन्हिया लसताय् वसपोलया सु स्वास्थ्य, ताःआयु व मंगल कामना यासे छवाःयंकं न्ह्याःगु ज्याझ्वलय् आपालं भिक्षु, अनागारिका गुरुमां व लामा गुरुपिंसं अभिधम्म पाठ याना बिज्याःगु खः ।

ज्याझ्वःया न्हापांगु दिं संघनायक श्रद्धेय भिक्षु बोधिसेन महास्थविरं धर्मदेशना बियाबिज्याःगु खःसा वसपोललिसें उप संघनायक भिक्षु गुणघोष महास्थविर, अखिल नेपाल भिक्षु महासंघया अध्यक्ष श्रद्धेय भिक्षु धम्मशोभन महास्थविर, भिक्षु राहुल महास्थविर, भिक्षु सद्धातिस्स, भिक्षु कोलित, भिक्षु उपतिस्स लगायतया भिक्षु गणं धम्मस·नी पाठ यानाबिज्याःगु खः ।

निन्हुया दिं भिक्षु कोण्डन्य महास्थविरं धर्मदेशना बियाबिज्यासे बुद्ध विहारया स्वम्ह भिक्षुपिं, भिक्षु अशोक, भिक्षु सुख, भिक्षु पियदस्सी, भिक्षु संरक्खितं विभ· पाठ याना बिज्याःगु खःसा स्वन्हुया दिं भिक्षु बोधिज्ञान महास्थविरं बियाबिज्याःगु धर्मदेशना लिपा विश्वशान्ति विहारया न्याम्ह भिक्षुपिं नापं भिक्षु शोभित महास्थविर, भिक्षु चन्दगुप्तं धातुकथा वाचन यानाबिज्याःगु खः ।

थुकथं हे प्यन्हुया दिनय् भिक्षु धर्ममूर्ति महास्थविरया नेतृत्वय् आनन्दकुटी विहरया न्याम्ह भिक्षुपिंसं पुग्गलपञ्ञाती, न्यान्हुकुन्हु श्रद्धेय भिक्षु सयादो ऊ. सुजनपियं धर्मदेशना व ऊ इन्दक, ऊ जागर, भिक्षु ञाणबुद्ध, भिक्षु भद्दको, भिक्षु शीलभद्र, भिक्षु पियरतन नापं लुम्बिनीं बिज्याःपिं निम्ह भन्तेपिंसं कथावत्थु पाठ वाचन यानाबिज्याःगु खः ।

वसपोल धम्मावति गुरुमांया बुन्हिया दिं गुरुपुन्हिकुन्हु श्रद्धेय भिक्षु निग्रोध महास्थविरं धर्मदेशना बियाबिज्यासे न्ह्याःगु ज्याझ्वलय् विश्वशान्ति विहारया न्याम्ह भन्तेपिंसं यमक, भिक्षु पञ्ञासार महास्थविरं धर्मदेशन बियाबिज्याःगु न्हय्न्हुया दिंकुन्हु सुमंगल विहारया न्याम्ह भन्तेपिं नापं भिक्षु धर्मगुप्त, भिक्षु सुमेध, भिक्षु समित, भिक्षु सारद व भिक्षु भद्दियं पट्ठान पाठ यानाबिज्याःगु खःसा दकलय् लिपांगु दिं वज्रयान व महायानपाखें गुरुजु व लामा गुरुपिंसं वज्रयान व महायान पाठ यानाबिज्याःगु खः ।