सम्पदा पदयात्राया त्वाःत्वालय् पेन्टिङ

येँ – कन्हय् सम्पदा पदयात्रा जुइगु जूगु दु । थनया बसन्तपुरं न्हिनय् १ः३० बजे न्ह्याइगु उगु पदयात्राया उलेज्या संस्कृति मन्त्री रविन्द्र अधिकारीं यानादी । वंगु वैशाख २ गतेनिसें विश्व सम्पदा मूल समारोह समितिया ग्वसालय् न्ह्याःगु ज्याझ्वः कन्हय् क्वचायेत्यंगु खः ।

थ्व सम्पदा पदयात्रा मरुया सन्तानेश्वर महाद्यः जुयाः मरुबही, बन्जाःहिति, न्यत, लोकेश्वर गल्लि, बुरांख्यः, दलु चौतारा, भुइख्यलय् थ्यंकाः क्वचाइ । भुख्यलय् प्रधानमन्त्री केपी ओली मूपाहां कथं झाइ । ज्याझ्वलय् थीथी सांस्कृतिक ज्याझ्वःया लिसें नेवाः नसा ब्वज्या, पेन्टिङ ब्वज्या नं जुइगु खँ सांसद जीवनराम श्रेष्ठं कनादीगु दु ।

नेवाःतय् सम्पदा, संस्कृति संरक्षण यायेगु लिसें नेवाः शहरी लागाय् नं पर्यटन विकास यायेगु आज्जु कथं उगु ज्याझ्वः यानागु खँ नं वय्कलं कनादिल ।

कन्हय्या ज्याझ्वःयात ग्वाहालि जुइ कथं थौं हनुमानध्वाखाया महाद्यः पार्वती देगलय् पेन्टिङ कार्यशाला ज्याझ्वः यायेत्यंगु दुसा अन लिपा सम्पदा पदमार्गया थीथी त्वालय् पेन्टिङ च्वयेगु ज्या जुइगु खँ नं वय्कलं जानकारी बियादीगु दु । पेन्टिङ वर्कसप ११ः३० बजे जुइसा थीथी त्वालय् थौं न्हिछि हे पेन्टिङ यायेगु ज्या याइगु न्ह्याइ ।

विश्व सम्पदा दिवसया झ्वलय् म्हिगः थनया हनुमानध्वाखाय् मानव निर्मित व प्राकृतिक विश्व सम्पदाया आधारय् तयार याःगु हुलाक टिकटया ब्वज्या नं याःगु दु । ज्याझ्वःया उलेज्या सञ्चार तथा सूचना प्रविधि राज्यमन्त्री गोकुलप्रसाद बास्कोटां यानादीगु खःसा ज्याझ्वलय् प्रतिनिधिसभाया सांसद जीवनराम श्रेष्ठ, प्रदेशसभा सांसद राजेश शाक्य, हुलाक सेवा विभागया निमित्त महानिर्देशक राजन पौडेल, फिलाटेलिक सोसाइटीया अध्यक्ष शंकर श्रेष्ठपिंसं ब्वति कयादीगु खः ।