ख्वपय् विद्यालय संचालनया तयारी

ख्वप (नेपालभाषा टाइम्स) – ख्वप नगरपालिकां विद्यालय संचालनया निंतिं गृहकार्य न्ह्याकूगु दु । नगरपालिकां विद्यालय संचालन यायेगु तयारी कथं सरोकारवालालिसे सहलह याःगु दु । सरकारं कोरोना संक्रमणया जोखिम अप्वया वनाच्वंगुयात ध्यानय् तयाः विद्यालय चायेकेगु वा मचायेकेगु निर्णय यायेगु जिम्मा स्थानीय तहयात बिउगु खः । थ्व ल्याखं ख्वप नगरपालिकां विद्यालय संचालन यायेगु सम्बन्धय् सामुदायिक व संस्थागत विद्यालयया सरोकारवालालिसें सहलह याःगु खः ।

ख्वप नगरपालिकाया प्रमुख सुनील प्रजापतिं सरकारं क्वःछिनातःगु स्वास्थ्य सुरक्षा मापदण्ड पालना यानाः जक विद्यालय संचालन याये फइगु खँ धयादीगु दु । वय्कलं सुरक्षा मापदण्ड पालना यानाः ‘विद्यालय संचालन सम्बन्धी कार्यढाँचा-२०७७’ सार्वजनिक यायेधुंकूगु अवस्थाय् स्थानीय तहं कोरोना संक्रमणया अवस्था विचाः यानाः विद्यालय संचालन याये फइगु खँ धयादीगु दु ।

उगु इलय् वय्कलं अनलानइक कक्षा अझ परिस्कृत यानाः न्ह्याकेमाःगु खँय् नं बः बियादीगु दु । सहलहया इलय् सहभागि शिक्षक संगठनया प्रतिनिधितय्सं कोरोनाया जोखिमयात ध्यानय् तयाः विद्यार्थीतय् भौतिक उपस्थितिइ तत्काल विद्यालय संचालन यायेत हथाय् चाये मजिउगु सुझाव बिउगु खः । विद्यालय संचालन न्ह्यः कक्षाक्वाथा निर्मलीकरण, सुरक्षा मापदण्ड पालना,वैकल्पिक शिक्षा पद्धतियात नं ध्यान बीमाःगु सहभागितय्सं धाःगु दु ।