ने. सं. ११४६ चिल्लागा नवमी -

२७ गतेनिसें यातायात ठप्प

नेउवा महासंघं नं यातायात व्यवसायीया साथ त्वःतल

येँ – सरकारं नं कडा कारवाही यायेगु निर्णय याःगु दु । यदि आन्दोलनय् कुहां वनाः गाडी चले मयात धाःसा वयागु दर्ता खारेज यानाः भविष्यय् तकं चले याके मबीगु तकया ख्याच्वः सरकारं बिउगु दु । सरकारं आवंलि यातायात ख्यलय् कायम जुयाच्वंगु सिन्डिकेट प्रणाली खारेज यानाः फुक्क हे व्यवसायीत कम्पनीया रुपय् दर्ता याः वयेत आह्वान यायेधुंकूगु दु ।

थ्वहे झ्वलय् नेपाल उद्योग वाणिज्य महासंघं नं म्हिगः छगू वक्तव्य जारी यासें सिन्डिकेट खारेज यायेगु सरकारी निर्णययात लसकुस यासें यातायात व्यवसायीतय्त आन्दोलनया ज्याझ्वः लित कायेत इनाप याःगु दु । महासंघं नं सरकारया निर्णययात लसकुस याःगुलिं यातायात महासंघ संकटय् लाःगु दु ।

महासंघं वैशाख २१ गते छन्हु यातायात बन्द यायेगु व २७ गतेनिसें अनिश्चितकाल तक हे बन्द यायेगु ज्याझ्वः घोषणा यायेधुंकूगु दु । सरकारं यातायात व्यवसायीतय्त नं करया दायराय् हयेगु लागिं कम्पनी ऐन कथं दर्ताया आह्वान याःगु दु । थुकियात यातायात महासंघं विरोध याःसां नं थ्व दर्ताय् वनेमाः वा म्वाः धइगु खँय् व्यवसायीतय् दथुइ विवाद दु ।

ट्यांकर व्यवसायीतय्त नं ख्याच्वः

यातायात व्यवसायीतय्सं यायेत्यंगु आन्दोलनय् सहभागी जुइगु धकाः तयारी यानाच्वंपिं पेट्रोल ढुवानी याइगु ट्यांकर व्यवसायीतय्त सरकारं आन्दोलनय् मवनेत ख्याच्वः बिउगु दु । पेट्रोलियम पदार्थया ढुवानी अतिकं संवेदनशील विषय जूगु कारणं ट्यांकर व्यवसायीतय्सं थुकियात हलुका ढंगं मकायेत नं नेपाल आयल निगमं इनाप याःगु दु ।

यदि उपिं थ्व आन्दोलनय् सहभागी जू वन धाःसा अज्याःगु ट्यांकरलिसे सरकारं यानातःगु सम्झौता खारेज यायेगु व भविष्यय् उमित गबलें नं पेट्रोल ल्ह्ययेगु ज्याय् तयेगु जुइ मखु धकाः नं स्पष्ट याःगु दु ।राज्यया सुविधा व सुरक्षा कयाः पेट्रोलियम पदार्थ ढुवानीया ज्या याइपिं ट्यांकर व्यवसायीत आन्दोलनय् वन धाःसा उकियात सरकारं सहः मयाइगु खँ नं धाःगु दु ।

अत्यावश्यक वस्तु ढुवानीया ज्या याइपिं ट्यांकर व्यवसायीत मेपिनिगु उक्साहटय् वनाः छुंतां म्वायेक हडतालय् कुहां वन धाःसा सरकारं उपिंलिसे यानातःगु सम्झौता भविष्यय् गबलें नं नवीकरण हे मजुइ कथं खारेज यायेगु कडा चेतावनी नं आयल निगमं बिउगु दु ।