बालाजुइ सतक विस्तार याःथाय् थौं न्याम्ह ज्वनायंकल

येँ – बालाजुइ सतक विस्तार यायेत स्थानीयतय् छेँ थुनाः खाली यानातःगु जग्गाय् जस्तां घेरे याःगु तछ्याना बिउबलय् न्याम्हेसित ज्वना यंकूगु दु । थःपिनिगु जग्गाय् घेरे यानातःगु जस्ता तछ्यानाः लिकयाबिउबलय् जग्गा थुवाःत महेश्वर मानन्धर, मनोज श्रेष्ठ, रुचित श्रेष्ठ, भीमदेव श्रेष्ठ व मीन शाहीयात ज्वनायंकूगु खः । उमित आः महानगरी प्रहरी परिसर बालाजुइ तयातःगु दु ।

बालाजु बाइपासय् सतक विस्तार यायेत धकाः छखेपाखेया जक ३९ खा छेँ उपत्यका विकास प्राधिकरणं थुनाबिउगु खः । थ्व छेँ थुंथाय् झिंच्याखा छेँ तक सतक विस्तार यानाः पिच यायेधुंकूगु दुसा नीछखा छेँ पीउगु जग्गा खाली जुयाच्वंगु खः । थ्व खाली जुयाच्वंगु जग्गाय् सूचना केन्द्र दयेकेगु धकाः शहरी विकास राज्यमन्त्री रामवीर मानन्धरया पिए सहित न्याम्ह खुम्ह मनूत वयाः म्हिगः बहनी जस्तां घेरे याःगु खः ।

थःपिंत छुं सुचं हे मबिसे, छुं आधार हे मदयेकं पीडितपिनिगु जग्गाय् जस्तां घेरे याःवःगुलिं थौं सुथय् थःपिंसं जस्ता लिकयाबियागु खँ उपत्यका सतक विस्तार पीडित संघर्ष समितिया नायः सुमन साय्मिं कनादीगु दु । सुथय् जस्ता लिकयाच्वंगु इलय् न्याम्हेसित ज्वना यंकूगु खँ कनादिसें अध्यक्ष साय्मिं वय्कःपिंत त्वःतकेगु निंतिं थौं ११ः३० बजे बालाजु चौकी वनेत्यनागु खँ धयादीगु दु । वय्कलं पीडितपिंत त्वःतकेगु निंतिं दबाब बीत सकलें चौकी मुनेत इनाप नं यानादीगु दु ।