कोरोना विरुद्ध देय्न्यंकं मास्क अभियान

येँ – सरकारं कोरोना रोकथाम व नियन्त्रणया निंतिं देय्न्यंकं ‘नेपाल मास्क अभियान’ न्ह्याकूगु दु । स्वास्थ्य तथा जनसंख्या मन्त्रालयं थ्व अभियान न्ह्याकूगु खः । वइगु शुक्रवाःतक देय्न्यंकं न्ह्याइगु थ्व अभियान ‘महामारी नियन्त्रण व रोकथामय् जिगु प्रतिवद्धता, मास्क तयेगु थौंया आवश्यकता’ धइगु नारा बियातःगु दु । मन्त्रालयया सहप्रवक्ता डा. समीर अधिकारीं कोरोना भाइरसया महामारीपाखें बचे जुइत थ्व अभियान न्ह्याकागु खः धयादीगु दु ।

जनस्वास्थ्य मापदण्डया बेवास्ता वा हाचां गायाः जुइगु, मास्क तयेगुलिइ लापरवाही यानाच्वंगु व थुकिं कोरोना संक्रमितया ल्याः अप्वया वनाच्वंगु, हुलमुलय् तकं मास्क मतसे जुइगु थेंज्याःगु लापरवाही अप्वया वनाच्वंगु धासें स्वास्थ्य सुरक्षा मापदण्डया पालना व मास्कया महत्व थुइकेगु ल्याखं थुगु अभियान न्ह्याकागु वय्कलं धयादिल ।

कोरोना भाइरसया संक्रमणपाखें बचे जुइत मास्क तयेगु तसकं प्रभावकारी जूगु धासें वय्कलं अनिवार्य रुपं सकसिनं मास्क तयेत नं इनाप यानादिल । लिसें वय्कलं मास्क तयेगुलिइ मनूतय् व्यवहारय् हिउपाः हयेगु निंतिं थ्व अभियान प्रभावकारी जुइ फइगु नं दावी यानादिल ।

थ्व हे झ्वलय् नेपाल प्रहरीपाखें ‘छिगु मास्क ग्व ?’ धइगु ज्याझ्वःयात निरन्तरता बिया वयाच्वंगु दु । कोरोना संक्रमण रोकथाम व जोखिम न्यूनीकरणया निंतिं नेपाल प्रहरी न्ह्याका वयाच्वंगु थ्व ज्याझ्वः अन्तर्गत वंगु आइतवाः छन्हुया दुने जक झिद्वलं मल्याकयात निःशुल्क मास्क वितरण याःगु दु ।

प्रहरीं वंगु बैशाख ६ गतेनिसें न्ह्याकूगु ज्याझ्वः अन्तर्गत आतकया दुने न्यागू लख स्वीन्हय्द्वलं मल्याकयात निःशुल्क रुपं मास्क वितरण याये धुंकूगु दु ।