जुजु वीरेन्द्रया निजी छेँ नं सकसितं खुल्ला

येँ – पुलांम्ह जुजु वीरेन्द्र शाहया निजी निवास आः सर्वसाधारण जनतां नं स्वये दइगु जूगु दु । वइगु चैत १ गतेनिसें गणतन्त्र स्मारक सञ्चालन यायेगु निर्णय यासें नारायण हिटी दरबार संग्रहालय तथा गणतन्त्र स्मारक व्यवस्थापन तथा सञ्चालन विकास समितिं पुलांम्ह जुजु वीरेन्द्र च्वनीगु निजी निवास नं सर्वसाधारणया निंतिं खुल्ला यायेत्यंगु खः । वइगु वैशाख १ गतेनिसें वीरेन्द्रया निजी निवास सर्वसाधारणं अवलोकन यायेफइगु कथं व्यवस्था याःगु खः ।

थ्व स्वयां न्ह्यः नारायणहिटी दरवार संग्रहालय सर्वसाधारणया निंतिं खुल्ला याःगु खःसां जुजु वीरेन्द्रया निजी निवासय् धाःसा दुत मछ्वः । समितिया कथं सुथय् ८ बजे निसें न्हिनय् ४ बजे तक संग्रहालय चाली । न्हापांगु लछि अन दुहां वनेगु निःशुल्क जुइसा लछि शुल्क कायेगु शुरु याइ । उकथं हे गुदँ स्वयां म्हो दुपिं विद्यार्थी व ७० दँ पुलेधुंकूपिं जेष्ठ नागरिकयात नं निःशुल्क जुइ ।