थाय्थासय् तःधंगु पार्टी विरुद्ध बागी उम्मेदवारी

येँ (नेपालभाषा टाइम्स)- मंसिर ४ गते जुइगु प्रतिनिधि सभा व प्रदेश सभाया चुनावय् उम्मेदवार जुइपिनि मनोनयन दर्ताया ज्या म्हिगः क्वचाल । थ्व मनोनयन दर्ताया ज्याय् आपालं थासय् असन्तुष्टि ब्वलंगु दुसा यक्व निर्वाचन क्षेत्रय् पार्टीया आधिकारिक उम्मेदवार विरुद्ध बागी उम्मेदवारी बीगु ज्या जूगु दु ।

थुकी येँया क्षेत्र नं. ७ य् एमालेया पुलांम्ह सांसद रामवीर मानन्धरं पार्टीया आधिकारिक उम्मेदवार दुसां नं स्वतन्त्रं उम्मेदवारी दर्ता यानादीगु दु । अन एमालें श्याम घिमिरेयात उम्मेदवार दयेकूगु दु ।

अथे हे मकवानपुरय् एमालें पञ्च नेता कमल थापायात पार्टीया चुनाव चिं सुद्र्यः कयाः उम्मेदवारी दर्ता याकेवं स्थानीय एमाले कार्यकर्तातय्सं हेटौंडाया सानो पोखराय् च्वंगु पार्टी ज्याकुथिइ तालं ग्वया बिउगु दु । एमाले कार्यकर्तातय्सं आः थापाया पक्षय् प्रचार याये मफइगु खँ धायेधुंकूगु दु ।

अथे हे उदयपुर क्षेत्र नं. २ लय् गठबन्धनया उम्मेदवारयात टिकट बिल धकाः कांग्रेसया पुलांम्ह नेता रामकुमार राईं बागी उम्मेदवारी बियादीगु दु ।

अछाम क्षेत्र नं. १ य् पार्टीया जिल्ला समितिं एकल रुपं सिफारिस याना हःम्ह भीम रावलया टिकट काटे यानाः माओवादीं दुहां वःम्ह झपट बोहरायात टिकट बिल धकाः स्थानीय एमाले कार्यकर्तातय्सं पार्टी अध्यक्ष केपी ओली विरुद्ध हे नाराबाजी याःगु दु । उमिसं उम्मेदवारी दर्ता याः वंम्ह पार्टीया उम्मेदवार झपट बोहरायात हाकुगु ध्वाँय् क्यनाः विरोध याःगु खः।

मेखे दैलेख क्षेत्र नं. २ (ख) लय् धाःसा एमाले त्वःताः दुहां वःम्ह योगेन्द्र शाहीयात टिकट बिल धकाः माओवादी कार्यकर्तातय्सं विद्रोह याःगु दु । अन माओवादीं उपेन्द्रकुमार रावतयात टिकट बीगु धकाः ठिक्क याना तःगु खःसां एमालेपाखें घनश्याम भुषाल नापं तुं पार्टी त्वःताः दुहां वःम्ह योगेन्द्र शाहीयात पार्टीया सदस्यता हे मबिसे टिकट निं न्हापां बिउगु खः । थुकिं यानाः अन माओवादीया संगठन तकं स्यने फइगु आशंका याना हःगु दु ।

चितवन क्षेत्र नं. ३ य् कांग्रेसया जगन्नाथ पौडेलं हानं बागी उम्मेदवारी बियादीगु दु । स्थानीय चुनावय् अन माओवादीया मेयर उम्मेदवार रेणु दाहालयात कांग्रेसं समर्थन यात धकाः पौडेलं बागी उम्मेदवारी बियादीगु खःसा थुकिं यानाः वय्कः पार्टीया कारवाहीलय् लाःगु खः ।
कपिलवस्तुइ एमालें टिकट मबीवं नांजाःम्ह नेता घनश्याम भुषालं कपिलवस्तु १ पाखें स्वतन्त्र उम्मेदवारी बियादीगु दुसा वय्कःयात गठबन्धनं ग्वाहालि याइगु जूगु दु । अथे हे मोरङय् नं उम्मेदवारी दर्तायात कयाः थज्याःगु समस्या पिहां वःगु दु ।

थ्व चुनावय् नेपाली कांग्रेसया नेतृत्वय् सत्तासिन प्यंगू पार्टी जानाः गठबन्धन दयेकूगु खःसा विपक्षीपाखें नं नेकपा (एमाले) या नेतृत्वय् प्यंगू हे पार्टी जानाः मेगु गठबन्धन दयेकूगु खः । गठबन्धनपाखें थीथी पार्टीया उम्मेदवारतय्त टिकट बीमाःगु जूगुलिं थःगु हे पार्टीया टिकट आकांक्षीत धाःसा असन्तुष्ट जूगु दु ।