एनिमेटेड संकिपा ‘जय लाखे’या प्रिमियर याइगु
येँ(नेपालभाषा टाइम्स)÷यन्त्रकला स्टुडियोया ब्यानरय् निर्माण जूगु एनिमेटेड संकिपा ‘जय लाखे’या प्रदर्शन याइगु जूगु दु । वइगु भदौ १४ गते शनिवाः चाबहिलिइ च्वंगु केएल टावरया एफक्युब सिनेमा हलय् उगु संकिपाया प्रिमियर जुइगु निर्माण पक्षं जानकारी बिउगु दु ।
वाङ्मय शताब्दीपुरुष मदुम्ह सत्यमोहन जोशीया बाखं, संवाद व पटकथाया लिधंसाय् च्यादँ बिकाः उगु संकिपा बेलायतय् च्वनादीम्ह संयुक्त श्रेष्ठं निर्माण यानादीगु खः ।
संयुक्त श्रेष्ठया सम्पादन व निर्देशनय् निर्माण जूगु संकिपा वय्कःलिसें व नियुक्त श्रेष्ठं एनिमेटेशन यानादीगु खः । नेपालभाषा व खस नेपाली निगुलिं भासं निर्माण जूगु संकिपाया निर्माता बेलायतय् च्वनादीपिं लोचन मानन्धर व अञ्जना श्रेष्ठ व अमेरिकाय् च्वनादीपिं शैलैन्द्र मानन्धर व समिर महर्जन खः ।
गुथि अस्टे«लियाया प्रस्तुति जय लाखे संकिपा नेपाल ललितकला प्रतिष्ठान, नपालभाषा एकेदेमि, नेपालभाषा टाइम्स न्हिपौ, वल्र्ड नेवाः अर्गनाइजेसन व ज्यासः फिल्म्स लगायतया संघसंस्थाया सहकार्यय् निर्माण जूगु खः ।
घौछि व जःछि (१ घन्टा १५ मिनेट) ताःहाकःगु संकिपाय् नेवाः समुदायय् लाखेया इतिहास व महत्वयात क्यनेत स्वयातःगु दुसा राणा प्रधानमन्त्री जंगबहादुरया बेलायत भ्रमणया ऐतिहासिक सन्दर्भयात नं दुथ्याकातःगु दु ।
संकिपाय् ख्यालिजुजु मदनकृष्ण श्रेष्ठ, आशाकाजी थकू, नगिना जोशी, शरद कसाः, सानु ताम्राकार, सुनिता जुनु, हृदयप्रसाद मिश्र, रामप्रसाद श्रेष्ठ, मञ्जु श्रेष्ठ, सुरेन्द्र केसी, अकलमान महर्जन, सन्नी व्यञ्जनकार, शाक्य सुरेन, नानीहिरा प्रजापति, अनिरा तुलाधर, लगायतया आपलं सः बियातःगु दु ।
अथे हे संकिपाय् सत्यनारायण मानन्धर, सतिश महर्जन व निशा देसारया सः दुथ्यानाच्वंगु दुसा संगीत विश्व शाहीया दु । संकिपाया सह निर्माता शशि मानन्धर, दिनेश प्रधान, राजेश श्रेष्ठ, दया शाक्य, राकेश तुलाधर खःसा कास्टिंग निर्देशक सुनिता राजभण्डारी श्रेष्ठ ‘जुनु’ खः ।
LEAVE YOUR COMMENTS