भारतीय नोट नेपालय् हये दु तर लित यंके मदु

येँ – भारतं नेपालय् तःधंगु दरया भारतीय नोट हये दइगु तर लित यंके मदइगु व्यवस्था याःगु दु । भारतीय रिजर्भ बैंकं विदशी विनिमय प्रवद्र्धन विनियमावली संशोधन यासें निसः व न्यासः वंगु भारतीय नोट नीन्याद्वः तक हये फइगु व्यवस्था याःगु खः । भारतं विनियमावलीया नियम ८ (१) यात संशोधन यानाः थ्व स्वयां न्ह्यः प्रतिबन्ध तयातःगु उगु दरया नोट हये दइगु व्यवस्था याःगु खः ।

तर निद्वः वंगु नोट धाःसा हये दइ मखु । आइबीआईं तःधंगु दरया नोट हये दइगु व्यवस्था याःसा नं उगु हे विनियमा– वलीया दफा २ स दुगु नोट लित यंकेगु व्यवस्था धाःसा संशोधन याःगु मदुनि गुकिया कारणं नेपालय् तःधंगु दरया नोट ज्वना वःपिं व्यक्तिं खर्च मजूगु ध्यबा लित यंकेत वा भारतीय नोट स्वीकार याःपिं नेपाःमि नागरिकं ध्यबा हिलेत समस्या जुइफु ।

थुकिया बारे भारतीय रिजर्भ बैंकं गुुुगुं नं कथंया स्पष्ट व्याख्या याःगु मदुनि । मेखे नेपाल राष्ट्र बैंकया डेपुटी गभर्नर चिन्तामणि शिवाकोटीं नेपाल राष्ट्र बैंकं तःधंगु नोट नेपालय् हयेगु निंतिं खुला यायेत इनाप याना कथं निसः व न्यासः तका वंगु नोट नीन्याद्वः तका तक खुला यायेगु प्रस्ताव वःगु खःसां नं अज्याःगु ध्यबा हिलेगु प्रणालीबारे स्पष्ट यायेमाःगु लिसः बियागु व उकिया लिसः मवःतले नेपाय् अज्याःगु ध्यबा चले याये मफइगु खँ कनादीगु दु ।