
येँ (नेपालभाषा टाइम्स)÷मदुम्ह अनगारिका डा. अनोजा गुरुमांया अन्तिम संस्कार म्हिगः क्वचाल । वसपोलं हे पलिस्था यानाबिज्याःगु सुलक्षणकीर्ति विहारय् म्हिगः विहार संघ, अनगारिका संघ लिसें वसपोलया छेँजःपिंपाखें अन्तिम संस्कार सम्बन्धी पूजा पाठ यानाःलि शवयात धुलिखेल अस्पतालयात दान याःगु खः ।
विहारय् वसपोलयात पुलांम्ह मन्त्री लिसें सांसद कृष्णगोपाल श्रेष्ठ, येँ मनपाया उपप्रमुख सुनिता डंगोलपिंसं नेपाःया राष्ट्रिय ध्वाँय् फायेमाः सम्मान यानादीगु खः । अन्तिम श्रद्धाञ्जालि प्वंकेत एमाले अध्यक्ष केपी ओलीया जहान राधिका शाक्य लिसें आपालं हनेबहःपिनि उपस्थिति दुगु खः ।
विहारय् अन्तिम संस्कार सम्बन्धी पुजाया ज्या सिधयेकाः विहारंनिसें किपू वनेगु लँय् तक शवयात्रा याःगु खः । अनं लिपा शवयात धुलिखेल अस्पतालपाखे यंकूगु खः । विहार दुने हे विहारया पदाधिकारीपिं, वरिष्ठ गुरुमांपिं व वसपोलया शिष्यापिंसं अस्पतालया कर्मचारीतय्त वसपोलया शव मंकाः कथं हस्तान्तरण याःगु खः ।
ताःई न्ह्यवंनिसें क्यान्सर ल्वचं कयाच्वंम्ह डा. अनोजा गुरुमां वंगु मंगलवाः चान्हय् मेडिसिटी अस्पतालय् वासः याकुयाकुं मदुगु खः ।
LEAVE YOUR COMMENTS