विवाद ज्यनेवं किपुलिइ तःजिक बुंगद्यःया स्वां तयेज्या

येँ (नेपालभाषा टाइम्स)- खुला तक न्ह्याःगु ताःहाकःगु विवाद लिपा अन्ततः किपुलिइ स्वां तः वनेगु बुंगद्यःया १७०० दँ पुलांम्ह परम्परा म्हिगः ताःलाक क्वचाल । बुंगया पानेजुपिंसं किपुलिइ स्वां तः वयेगु लागिं अनं लिकया हःम्ह बुंगद्यः गुथि संस्थानयात लःल्हायेमाः धकाः जेठ ४ गते तकया अल्टिमेटम बिउगु खः ।

तर गुथि संस्थानयात द्यः लित बीगु खँय् हानं विवाद जुयाः म्हीग बहनी तक नं निर्णय याये मफयाच्वंगु खः । म्हीग किपू नगरपालिकाय् च्वंगु बैठक लिबाक तक नं निर्णय याये मफयाः अलमल जुयाच्वंगु खः । अन्ततः चान्हय् बैठकं बुंगद्यःया पानेजुपिंत हे लित बीगु व याकः मिसाया मूर्ति किपुलिइ लिपा पलिस्था याइगु संग्रहालयय् तयेगु धकाः निर्णय याःगु खः ।

उगु निर्णय यानाखतं चान्हय् हे किपू नपाया ज्याकुथिइ तयातःगु बुंगद्यःया मूर्ति पानेजुपिंत लःल्हाःगु खःसा पानेजुपिंसं नं चान्हय् हे द्यःयात गाडीइ तयाः बुंगय् यंकूगु खः । यल मनपाया नगर प्रहरी पाः तयाः द्यःया मूर्ति यंकूगु खःसा आः उकियात बुंगय् ह्यगृव भैरवया द्यःछेँय् च्वंगु पानेजु संघया ज्याकुथिइ तयातःगु दु ।

थःपिंत द्यः लित बीवं पानेजुपिंसं म्हिगः सुथय् किपुलिइ स्वां तः वयेगु धकाः जानकारी बिउगु खः । उकथं म्हिगः सुथय् यलया जल पानेजु सुरज शाक्य स्वां तयेगु लागिं लाकां मन्ह्यासे यलंनिसें किपुलिइ तक न्यासि वयाः थ्यंकादीगु खः । वय्कःयात किपुलिइ बाजं थानाः लसकुस यासें प्यंगः थामय् यंकूगु खः । वयां लिपा वय्कलं प्यंगः थामय् च्वंगु ल्वहँतय् फ्यतुनाः अनयाम्ह याकः मिसा लक्ष्मीकुमारी महर्जनयात बुंगद्यःया स्वां लःल्हानादीगु खः ।

म्हिगः किपुलिइ थ्व स्वां तयेगु सांस्कृतिक ज्याझ्वः स्वयेगु लागिं यक्व हे मनू थ्यंगु खः । बुंगद्यःया मूर्ति विवादं यानाः स्वां तयेगु पर्व नं यक्वं प्रचार जूगुलिं म्हिगः मनू नं यक्व थ्यंगु खः ।