ने. सं. ११४६ बछलागा चौथी -

रत्नशोभाया रत्नं भय् बिउगु यइपुगु सः ज्याझ्वः

येँ – नेपालभाषा सांगीतिक ख्यःया अतिकं नांजाःम्ह म्येँ हालामि मय्जु रत्नशोभा महर्जनया एकल सांगीतिक ज्याझ्वः वंगु शनिवाः थनया राष्ट्रिय सभागृहय् जुल । स्वयम्भू वना, पासा मुना (मंकाः ग्वाहालि पुचः)या ग्वसालय् ज्ञानमाला भजन खलः, स्वयम्भू ८१ दँ क्यंगु लसताय् ‘रत्नं भय् बिउगु, यइपुगु सः’ नामं उगु ज्याझ्वः जूगु खः ।

ज्याझ्वलय् म्येँ हालामि महर्जनं थःगु यइपुगु सलय् लोकंह्वाःगु थीथी म्येँ न्यंकादीगु खः । ज्याझ्वलय् वय्कलं म्येँच्वमि पूर्णकाजी ज्यापूया याकः च्वसाय् व संगीतकार जुगल डंगोलया एकल संगीत संयोजनय् म्येँ न्यंकादीगु खः ।

थः मांया लुमन्तिइ च्वयातःगु म्येँ विना संगीतय् न्यंकाः ज्याझ्वः न्ह्याकादीगु खःसा ज्याझ्वलय् जनकवि दुर्गालाल श्रेष्ठ, निर्मलरत्न शाक्यं च्वयादीगु, मनराजा नकःमिं लसय् हनादीगु व जीवित जल्मिं संगीत संयोजन यानादीगु म्येँ नं न्ह्यब्वयादीगु खः ।

स्वयम्भू ज्ञानमाला भजन खलः ८१ दँ क्यंगु लसताय् लाकाः जूगु ज्याझ्वलय् मूपाहां येँ महानगरपालिकाया प्रमुख विद्यासुन्दर शाक्यं ज्ञानमाला भजनया नीछगूगु संस्करणया पितब्वज्या यानादीगु खःसा वंगु ४१ दँ न्ह्यवंनिसें ज्ञानमालाया भजनय् निरन्तर रुपं सक्रिय योगदान बिया वयाच्वनादीम्ह पुण्य शाक्ययात नीन्याद्वः तका दांया ‘ज्ञानमाला मंगलहेरा सिरपाः’ नं लःल्हाःगु खः ।

ज्याझ्वलय् नेपालभाषाया नांजाःपिं म्येँ हालामिपिं ख्यालिजुजु मदनकृष्ण श्रेष्ठ, जुजुकाजी रंजित, सानुबाबु महर्जन, सुमन कपाली, सोनी राजभण्डारी, सतिश महर्जन दिपा महर्जन, रोजी महर्जनपिंसं साथ बियादीगु खःसा रुपेन श्रेष्ठ, निक्की महर्जन, श्रृष्टि महर्जन, आराध्यलक्ष्मी खड्गीपिंसं हुलाप्याखं न्ह्यब्वयादीगु खः ।

ज्याझ्वलय् विशेष पाहांकथं येँ मनपा उपप्रमुख हरिप्रभा खड्गी श्रेष्ठ, पाहाकथं वरिष्ठ गायम प्रेमध्वज प्रधान, सांसद जीवनराम श्रेष्ठ, प्रदेशसभा सदस्य राजेश शाक्य, ज्ञानमाला भजन खलः स्वयम्भूया पुलांम्ह नायः शान्तराज शाक्य लगायत विशिष्ट व्यक्तित्वपिनिगु उपस्थिति दुगु खः । ज्याझ्वलय् संगीत संयोजन जुगल डंगोलं यानादीगु खः ।