‘नुगः चकंके कोकलिसे’ योजना

येँ – ‘सलसं सम्बन्धया सलंसः भावना’ धयागु न्हूगु विषयवस्तु ज्वनाः लोकंह्वाः पेय पदार्थ कोकाकोलां ‘नुगः चकंके कोकलिसे’ योजना सार्वजनिक याःगु दु । लोकंह्वाःगु ब्याण्ड कुटुम्बया धुनय् कलाकार उपकारं बुधवाः मोहनिया थिमय् कोकया लोगो आर्ट यायेधुंकाः कोकाकालाया कन्ट्री डाइरेक्टर अम्बुज सिंहं व प्रबन्ध निदेृशक प्रदीप पाण्डें योजनाया शुभारम्भ यानादीगु खः ।

थ्व योजना अन्तर्गत थीथी झिंखुगू मानवीय भावना च्वयातःगु स्टिकर तयाः कोकया बोटल पिहां वइगु जूगु दु । कोकया बोटलय् तयातःगु स्टिकरय् ‘माया, साथ, खुसी, रमाइलो, मित्रता, हौसला, श्रद्धा, मिलन, सहयोग, जमघट, हाँसो’ थेंज्याःगु भावना च्वयातःगु दइ ।

योजना शुभारम्भ यायेगु झ्वलय् अभिनेत्री प्रियंका कार्कीं थःत थः ड्राइभरं क्यना वयाच्वंगु सद्भावया खँ न्यंकूगु खःसा कलाकार तिपू निश्चिल बस्नेत व स्वस्तिमा खड्कां थःपिनि भावना न्ह्यब्वःगु खः । अथेहे कुटुम्बं नं थःगु ब्याण्डया दुजःपिं आःतक नापनापं साथ दुगु खँ न्ह्यब्वःगु खः ।

ज्याझ्वलय् न्ववासें कन्ट्राइ डाइरेक्टर सिंहं सम्बन्धतय्त विशेष प्राथमिकता बियाः उत्सव न्यायेकेगु निंतिं कोक व थःगु भावना थः यःपिं लिसे हिलाबुला यायेत अभिप्रेरित यायेगु निंतिं थ्व योजना हयागु खँ कनादिल ।