ख्वप नगरया प्रधानाध्यापक, प्रिन्सिपलतय् भेला
ख्वप(नेपालभाषा टाइम्स)÷ख्वप नगर दुने संचालन जुयाच्वंगु ब्वनेकुथिया प्रधानाध्यापक, प्रिन्सिपलतय् छगू भेला जूगु दु । ख्वप नगरपालिकाया ग्वसालय् ख्वप नगर दुने संचालन जुयाच्वंगु सामुदायिक, संस्थागत व सार्वजनिक गुथि अन्तर्गत संचालन जुयाच्वंगु ब्वनेकुथिया प्रधानाध्यापक, प्रिन्सिपलतय् भेला जूगु खः ।
भेलाय् नवासें ख्वप नगरपालिकाया प्रमुख सुनिल प्रजापतिं शैक्षिक गुणस्तर कायम याना तयेत ख्वप नगर दुने संचालन जुयाच्वंगु दक्वं ब्वनेकुथिया प्रधानाध्यापक, शिक्षकतय्सं थःथःगु थासं फक्व योगदान यायेत इनाप यानादिल । स्थानीय सरकार संचालन ऐन, २०७४ स्थानीय तहयात विद्यालय व्यवस्थापनया जिम्मेवारी बियातःगु खँ न्ह्यथनादिसें वय्कलं थुकिया हे लिधंसाय् ख्वप नगरपालिकां थःगु जिम्मेवारीकथं ब्वनेकुथिया नियमन, व्यवस्थापन व अनुगमनयात प्रभावकारी यायेत स्वयाच्वनागु दु धयादिल ।
प्सल टुया अध्ययन सिधयेकाः विद्यार्थीत उच्च शिक्षाया निंतिं धमाधम विदेश वनेगु क्रम अप्वया वनाच्वंगु वर्तमान जटिल समस्या खः धासें उच्च शिक्षाया जग विद्यालय जूगुलिं सामुदायिक व निजी विद्यालयं समाजसेवाया भावनां गुणस्तरी शिक्षा बीमाःगु आवश्यक जूगु खँय् वय्कलं बः बियादिल ।
ज्याझ्वलय् ख्वप नगरपालिका ५ वडाअध्यक्ष योगेन्द्रमान बिजुक्छें नगरपालिकां सामुदायिक व संस्थागत ब्वनेकुथियात समान रुपं न्ह्यःने यंकेगु विचारं ज्या याना वयाच्वंगु खँ न्ह्यथनादिसें ब्वनेकुथितय्सं नं नगरपालिका व वडालिसे समन्वय यानाः वनेमाः धयादिल । ९ वडाअध्यक्ष रविन्द्र ज्याख्वं नगरपालिकां शैक्षिक ख्यलय् यानाच्वंगु ज्यायात कयाः जानकारी बियादीगु ज्याझ्वलय् नगरपालिकाया शिक्षा शाखा प्रमुख कृष्णप्रसाद कर्माचार्यं शाखापाखें वइगु शैक्षिक सत्रय् संचालन यायेगु ज्याझ्वःया बारे विस्तृत विवरण न्ह्यब्वयादीगु खः ।
LEAVE YOUR COMMENTS