फोटो कन्सर्नय् नक्कली लाइसेन्स प्रिन्ट

येँ – थनया न्हू सतकय् च्वंगु नांजाःगु फोटो कन्सर्न प्रा.लि. नक्कली स्मार्ट लाइसेन्स, नक्कली नागरिकताया प्रमाणपत्र, भारतया आधार कार्ड व प्रहरीया नक्कली परिचयपत्र दयेकेगु ज्याय् समेत संलग्न जुयाच्वंगु लूगु दु । थ्वहे आधारय् प्रहरीं अन ज्या याइपिं प्यम्ह कर्मचारीयात ज्वनायंकूगु दु ।
बल्खुइ च्वंगु आशिष स्टुडियो सञ्चालन याइम्ह सुभाष धाःम्ह बुद्धिबहादुर रोक्कायात नक्कली लाइसेन्स दयेकूगु द्वपनय् ज्वनाः छानबिन याःबलय् वं थःगु स्टुडियोय् नक्कली लाइसेन्सया डिजायन यानाः फोटो कन्सर्नय् प्रिन्ट याकाच्वंगु खँ पत्ता लगे जूगु खः । वयां लिपा प्रहरीं फोटो कन्सर्नय् छापा मारे याःबलय् अन नक्कली लाइसेन्स जक मखु नक्कली नागरिकता, आधार कार्ड व प्रहरी लिसें थीथी कलेजया नक्कली परिचयपत्र समेट प्रिन्ट यानाच्वंगु लुइकूगु खः ।
प्रहरीं अन नक्कली पत्र प्रिन्ट याइगु मेशिनलिसें सीपीयु, कटर मेशिन आदि समेत फोटोग्राफर कुमार तण्डुकार, सेल्स अफिसर अनन्ता गुरुङ, मार्केटिङ ज्या याइम्ह अशोक कार्की व क्यासियर मोहन यादवयात ज्वंगु दु ।
वंगु पुस १५ गते पुतली सतकय् ज्वंम्ह दिपक ब्लोनया स्मार्ट लाइसेन्स नक्कली जूगु सीदयेवं उकिया हे अनुसन्धान यायां वंबलय् प्रहरी फोटो कन्सर्न तक थ्यंगु खः । आः प्रहरीं थ्व खुम्हेसितं ज्वनाः थप अनुसन्धान यानाच्वंगु दु ।