टोपबहादुरयात एमालें हे सुचुका तःगु द्वपं
येँ (नेपालभाषा टाइम्स)- नक्कली भुटानी शरणार्थी प्रकरणय् नां पिहां वयेवं फरार जुयाच्वंम्ह पुलांम्ह उपप्रधान– मन्त्री लिसें विपक्षी एमालेया सचिव टोप बहादुर रायमाझीयात पार्टीं निलम्बन याना छ्व धकाः एमाले नेतृत्वयात दबाब वनेगु शुरु जूगु दु । कार्यकर्तातय्सं पार्टीयात थज्याःगु दबाब बिया हःसां पार्टीपाखें धाःसा आः थथें थज्याःगु पलाः ल्ह्वनेगु पाय्छि जुइ मखु धकाः निलम्बन याःगु मदुनि ।
पार्टीपाखें रायमाझीयात छुं कारवाही मयाःगु कारणं पार्टीं हे रायमाझीयात सुचुका तःगु दु धकाः पिने प्रचार जुयाच्वंगु खँय् नं कार्यकर्तातय्सं सः तया हःगु दु ।
पार्टीपाखें रायमाझीयात आः थथें छुं कारवाही मयाःसां म्हिगः च्वंगु एमाले सचिवालय बैठकं धाःसा बेपत्ता जुयाच्वंम्ह रायमाझीं प्रहरीया सम्पर्कय् वयाः थः विरुद्ध जुयाच्वंगु अनुसन्धानया ज्याय् ग्वाहालि यायेमाः धकाः निर्णय याःगु दु । एमाले नेतृत्वं बेपत्ता जुयाच्वंम्ह रायमाझी थःपिनि सम्पर्कय् मदु धकाः स्पष्टीकरण बीगु यानाच्वंगु दु । सञ्चार माध्यमतय्सं नं एमाले नेतृत्वयात रायमाझी पार्टीया सम्पर्कय् दु लाकि मखु धकाः न्ह्यसः तयेगु यानाच्वंगु दु ।
रायमाझी अझ नं दोषी ठहर मजूनिगु कारणं वय्कःयात तुरुन्त कारवाही यायेगु हथाय्गु ज्या जुइ धकाः नं एमाले नेतातय्सं स्पष्टीकरण बीगु यानाच्वंगु दु ।
थ्वहे झ्वलय् लापता जुयाच्वंम्ह रायमाझीया छेँय् म्हिगः प्रहरीं छापा मारे याःगु दु । यलया सातदोबाटोय् च्वंगु रायमाझीया छेँय् प्रहरीं छापा मारे याःगु खः । तर प्रहरीया छापापाखें रायमाझीया छेँनं छुं ठोस प्रमाण लुया मवःगु खँ धाःगु दु ।
प्रहरीं रायमाझीया काय सन्दिप रायमाझीयात धाःसा ज्वनेधुंकूगु दु । नेपाःमितय्त नकली भूटानी शरणार्थी दयेकाः अमेरिका यंकेगु धकाः ठगे याःपिं ठगतय्सं सन्दिपया नामय् उगु इलय् हे छगूत्या करोड तकाया चेक च्वयाः बीधुंकूगु खः ।
टोप रायमाझी प्रहरीयात समेत झंगः लानाः आः भारतपाखे बिसिउँ वनाच्वंगु अनुमान याःगु दु ।
LEAVE YOUR COMMENTS