महरायात न्ह्यःने तयाः रोशनीया बयान शुरु

येँ -पुलांम्ह सभामुख कृष्णबहादुर महरा विरुद्ध लाःगु जबर्जस्ती करणी कुतः सम्बन्धी मुद्दाया साक्षी प्रमाण बुझे यायेगु प्रक्रिया न्ह्याःगु दु ।
येँ जिल्ला अदालतय् विचाराधीन दुगु मुद्दा लिसे सम्बन्धित पीडित व मेपिं साक्षीया बकपत्र यायेगु ज्या न्यायाधीश अम्बिरराज पौडेलया इजलाशय् म्हिगः न्ह्याःगु खः । म्हिगः पीडित धाःम्ह रोशनी शाहीया बकपत्र शुरु जूगु खँ जिल्ला अदालतं धाःगु दु । थौं नं शाहीया बयान जारी जुइगु खँ अदालतं धाःगु दु । म्हिगः शाहीं बयान बियाच्वंगु इलय् कुनातःम्ह पुलांम्ह सभामुख महरायात नं अदालतय् उपस्थित याकूगु खः ।

शाही महरायात प्रहरीं ज्वनेवं थःत महरां यौन दुव्र्यवहार मयाः धासेंप्रहरीइ निवेदन तःगु खःसां नं अदालतय् धाःसा उकियात प्रमाण कथं न्ह्यब्वयेगु ज्या मजुयाच्वंगु खः । आः अदालतय् बयान बीगु झ्वलय् थःगु खँ तयेगु ह्वःताः चूलाःगु दु । शाहीं निक्वः तक जिल्ला अदालतय् महरां थःत ‘करणी यायेगु कुतः मयागु’ धकाः थःगु धापू
तयेत स्वःगु खःसां पीडितया धापू तयेगु ई मत्यःति धकाः वय्कःयात खँ तयेके मबिउगु खः ।