असोजय नसाज्वलं सम्बन्धी ब्वज्या

येँ – छि नसाज्वलंया पारखी खः ला ? छितः थीथीकथंया नसाज्वलंया सवाः काये यः ला ? छु छितः त्वँसा ज्वलंलिसें छिगु छेँय् वइपिं पाहाँपित बांलाक नकेत्वंके यः ला ? अथे खःसा छिं बाःछि ति पियादिसँ । छाय्कि वइगु असोजया निगूगु वालय् थज्याःगु जानकारी बीगु ल्याखं छगू प्रदर्शनी जुइत्यंगु दु ।

हाउस अफ राजकर्णिकार नांया पुचःपाखें थ्व हे वइगु असोजया १३ गतेनिसें १५ गतेतक स्वन्हुयंकं थनया भृकुटीमण्डपय् ‘रुस्लान वेभरेज एण्ड हस्पिटालिटी’ नांया प्रदर्शनी यायेत्यनागु छगू पत्रकार सम्मेलन यासें जानकारी बिउगु दु । प्रदर्शनीइ बेकरी, प्रशोधित नसाज्वलं नापं पेय पदार्थ व स्वागत सत्कार सम्बन्धी नं अनुभव व जानकारी बी ।

उगु प्रदर्शनी होटल, रेष्टुराँ, मल, सुपरमार्केट, क्लब, बार, पब संचालक नापं नांजाःगु होटलया सेफतय्सं अवलोकनकर्ताया इच्छा व चाहनाकथंया नसाज्वलं उत्पादन यायेगु नापं उकियात गुकथं न्ह्यब्वयेगु व सेवा बीगु धइगु बारे जानकारी बी ।

प्रदर्शनीइ पोखरा, लुम्बिनी, चितवन, धौख्यः, नगरकोट, थँबही लगायतया पर्यटकीस्तलय् च्वनाच्वंपिं विदेशीतय्त तकं सहभागि याकेगु योजना दुगु पुचःया संयोजक विरेन्द्र राजभण्डारीं पत्रकार सम्मेलनय् जानकारी बियादीगु दु ।