छत्रपाटी निःशुल्क चिकित्सालयया नवनिर्वाचित पदाधिकारीपिंत दसिपौ लःल्हात

येँ नेपालभाषा टाइम्स)- छत्रपाटी निःशुल्क चिकित्सालयया नव निर्वाचित पदाधिकारीपिंत वैशाख १६ गते शनिवाः जूगु निर्वाचन ज्याझ्वलय् दसिपौ लःल्हायेगु ज्या जूगु दु । डा. मनोजमा श्रेष्ठया अध्यक्षताय् भिंmछम्हेसिया न्हूगु कार्यसमिति निर्विरोध निर्वाचित जूपिं सकलसित निर्वाचन समितिं दसिपौ लःल्हागु खः ।

ज्याझ्वलय् मूपाहां येँ महानगरपालिका १७ वडा वडाअध्यक्ष नापं महानगरपालिकाया प्रवक्ता नविन मानन्धरं निर्वाचित जुयादीपिं सकल पदाधिकारीपिंत भिंतुना देछायेगु नापं छत्रपाटी निःशुल्क चिकित्सालय आः मात्र १७ वडाया जक मखु राष्ट्रया हे नमूना चिकित्सालय जुइगु लँपुइँ न्ह्याः वनाच्वंगु खँय् लसता प्वंकादिल ।

ज्याझ्वलय् नव निर्वाचित अध्यक्ष डा. मनोजमान श्रेष्ठं चिकित्सालययात थौं थनतक थ्यंकेत थः याकःचां जक मखु झी सकलसिया योगदानं यानाः सफल जूगुलिं सकलसित सुभाय् देछानादिल । वय्कलं चिकित्सालय् आः दयेकाच्वनागु माउबद्रि भवनय् नेपालय् निगू तःतःधंगु अस्पतालय् जक यानाच्वंगु अत्याधुनिक अपरेशन आः छत्रपाटी चिकित्सालय् नं तयेगु निंतिं थःपिं न्ह्याः वनाच्वनागु दु धासें न्हूगु भवनय् नांजाःम्ह गायिका आनि छोइङ डोल्माया ग्वाहालिइ नीगः डाइलेसिस मिसन संचालन जुइगु जूगु दुसा दया फाउण्डेनया ग्वाहालिइ अत्याधुनिक फिजियोथेरापि नं संचालन जुइगु जानकारी वय्कलं बियादिल । अथे हे वय्कलं येँमपा १७ वडा अध्यक्ष नविन मानन्धरया ग्वाहालिं येँ महानगरपालिकापाखें ज्येष्ठ नागरिकपिनिगु स्वास्थ्य उपचारया निंतिं हरेक वर्ष १ करोड दांया सम्झौता नं याकनं जुइत्यंगु नं जानकारी बियादीगु खः ।

वि.सं. २०१३ सालय् स्थापना जूगु थुगु चिकित्सालयया इतिहासय् न्हापांगु पटक दक्वं पदाधिकारीपिं निर्विरोध निर्वाचित जुयादीपिं अध्यक्ष डा. मनोजमान श्रेष्ठ, उपाध्यक्ष कुमारदेव मानन्धर, महासचिव कृष्निा श्रेष्ठ, सचिव जगदिश माली, कोषाध्यक्ष लहना श्रेष्ठ, सह कोषाध्यक्ष कृष्णप्रसाद मानन्धर व दुजःपिं डा. निरण महर्जन, सुमनकृष्ण श्रेष्ठ, जुजुकाजी महर्जन, सुरज श्रेष्ठ व डि.एल. चन्दू मानन्धरपिंत अभिवक्त विश्वराज भट्टराईया संयोजकत्वय् दुजःपिं केशव साय्मि, सृष्टि न्याँछयं व ग्वाहालिमि पुरन शाक्यपिनिगु निर्वाचन कमिटीं निर्विरोध निर्वाचित जूगु घोषणा यानादीगु खः ।