ओली गन थ्यन अन हे विरोध
येँ (नेपालभाषा टाइम्स)- झापाय् एमाले अध्यक्ष केपी ओलीयात आक्रमण याःगु खँयात कयाः येँय् सदनय् न्ह्यसः तयेगु ज्या जुयाच्वंसां पूर्वी नेपाःया पहिचानवादीतय्सं धाःसा अझ कडा पलाः ल्ह्वनेगु तयारी यानाच्वंगु खँ सीदुगु दु ।
झापाय् ओलीयात आक्रमण याःगु खँय् म्हिगः संसदय् एमाले सांसदतय्सं कडा रुपं सः तसें थुकिं यानाः नेपाःया गृहमन्त्री असफल जूगु दु धकाः द्वपं बिउगु खः । थ्व घटनाय् ल्हाः दुपिंत ज्वनाः कारवाही यायेमाःगु माग नं उमिसं याःगु दु ।
उखे इलामय् जूगु एमालेया भेलाय् न्ववासें अध्यक्ष ओलीं थःत विरुद्ध जूगु थ्व आक्रमणय् माओवादी व एकीकृत समाजवादीया नं ल्हाः दुगु द्वपं बियादीगु दु । वय्कलं आक्रमण याःपिं पहिचानवादीतय्त ‘आतंककारी’ धकाः द्वपं बियादीगु खः । अन न्ववासें ओलीं उगु आक्रमणय् लानाः निम्ह प्रहरी घाःपाः जूगु दु, उमित सरकारं बांलाक वासः यायेमाः धकाः नं धयादिल ।
थ्वहे झ्वलय् मेखे प्रदेश १ पुनः नामाकरण संयुक्त संघर्ष समितिया झापा जिल्ला समितिं ओलीयात आक्रमण याःगु द्वपनय् ज्वना तःपिं स्वम्ह पहिचानवादी कार्यकर्तातय्त तुरुन्त त्वःतेत माग याःगु दु । संघर्ष समितिं धाःकथं झापाया बद्ध शान्ति गाउँपालिकाय् शान्तिपूर्ण प्रदर्शन यानाच्वंपिं मित्र लिङदेनव बुलेट राईयात ज्वना यंकूगु खःसा लिपा बलिहाङ माबोयात छेँेय् वनाः ज्वना यंकूगु खः । ज्वना यंकूपिं स्वम्हं आन्दोलनकारीतय्त बिना शर्त त्वःतेगु लागिं संघर्ष समितिं माग याःगु दु ।
cथे हे प्रदेश १ यात कोशी नां तयेगु ज्याय् एमालेया हे मुख्यमन्त्री हिक्मत कार्कीया मू भूमिका दु व उकी एमाले अध्यक्ष केपी ओलीया नं साथ दु धासें पहिचानवादीतय्सं ओलीया विरोध यायेगु ज्याझ्वः दयेकूगु दु । म्हिगः पाँचथरया फिदिम थ्यंम्ह ओलीयात फिदिम बजारय् हे च्वनाः पहिचानवादीतय्सं विरोध याःगु खः । लिसें उमिसं अन ‘कोशी प्रदेश’ नां खारेज यायेमाः धइगु माग यासें बहनी मशाल जुलुस नं पिकाःगु खः ।
LEAVE YOUR COMMENTS