ध्यबा अप्वः काःसा कारवाही छु ?

बालं च्वनीपिंके मतया ध्यबा अप्वः मकायेत ख्याच्वः

येँ – नेपाल विद्युत प्राधिकरणया प्रमुख कुलमान घिसिङं सुं नं छेँथुवाःतय्सं बालं च्वनीपिंके प्राधिकरणं तोके यानातःगु भाः स्वयां अप्वः विद्युतया ध्यबा काये दइ मखु धकाः ख्याच्वः बियादीसां यदि गनं अप्वः ध्यबा कयाच्वंगु लुल धाःसा अज्याःपिंत छु कारवाही यायेगु धइगु नियम धाःसा आःतक दयेकूगु मफुनिगु खँ सीदुगु दु ।

अप्वः ध्यबा काये दइ मखु धकाः घरपतितय्त ख्याच्वः बिउसां अप्वः ध्यबा काइपिंत कारवाही याये फइगु अवस्था धाःसा प्राधिकरणयाके मदुगु खँ प्रमुख घिसिङं कनादीगु दु । बीबीसी नेपाली सेवालिसे खँ ल्हासें भाजु घिसिङं आःयात घरपति–तय्त सचेत यायेगु बाहेक मेगु छुं हे उपाय थःपिंके मदुगु खँ नं कनादीगु दु ।

सुं नं घरपतिं प्राधिकरणया भाः स्वयां अप्वः ध्यबा बालं च्वनीपिंके कयातःगु दुसा उकिया बारे बालं च्वनीपिंसं उजुरी तये फइगु खँ नं धाःगु दु । तर अज्याःगु उजुरी गन तयेगु व उकियात कयाः प्राधिकरणं छु कारवाही यायेगु धइगु छुं नियम धाःसा तयार मजूनि । प्राधिकरण थः हे अथे कारवाही याइगु निकाय मखुगु जुयाः थुकिया लागिं बिस्कं कार्यविधि हे दयेके मानिगु खँ नं वय्कलं कनादीगु दु ।

तर प्राधिकरणं आः थथें कार्यविधि दयेकेगु बारे बिचाः तकं मयाःनिगु खँ नं वय्कलं कनादिल ।प्राधिकरणं तोके याना तःगु स्वयां अप्वः ध्यबा काल धइगु गुनासो सर्वसाधारणया छेँपाखें स्वयां नं अप्वः कम्प्लेक्स भवनपाखें यक्व वयाच्वंगु खँ कँसें आः तत्काल अज्याःगु कम्प्लेक्स भवनतय्त सचेत यायेमाःगु आवश्यकता नं वय्कलं कुलादिल ।

कम्प्लेक्स भवनतय्सं थःथाय् बालं च्वनीपिं बैंक, ज्याकूतय्के तसकं अप्वः ध्यबा मतया ध्यबा म्हयाच्वंगु खँ वय्कलं कनादिल ।

सम्बन्धित बुखँ

LEAVE YOUR COMMENTS