कर्णदीपय् वातावरण मैत्री चिताया शिलान्यास

येँ – उदाय् समाजया ग्वसालय् कर्णदीपय् वातावरण मैत्री, ई व सिं म्हचायेक दाहसंस्कार यायेगु चिता दयेकेगु सुरु जूगु दु । शनिवाः छगू ज्याझ्वःया दथुइ येँ महानगरपालिकाया मेयर विद्यासुन्दर शाक्य ल्हातं वातावरण मैत्री चिताया शिलान्यास यानादीगु दु । ईकथं न्ह्याः वनेमाः धैगु खँयात प्राथमिकता बियाः, सकलसित अःपुइमा धइगु तातुनाः थुगु चिता दयेकेत्यंगु खः । ज्याझ्वलय् न्ववानादिसें मेयर शाक्यं थौंकन्हय् सम्पदा संरक्षणया सवालय् ज्या याये तसकं थाकुयाच्वंगु खँ धयादीगु खः ।

अथेहे ज्याझ्वलय् न्ववानादिसें येँ मनपा १५ वडाया अध्यक्ष ईश्वर मान डंगोलं ई कथं न्ह्याः वनेमाःगु बिचाः तयादिसें वडा पाखें माःकथंया तिबः बिया वनेगु बचं बियादीगु खः । थुकथं हे चिताया डिजाइन यानादीम्ह ई डा. चन्द्र बहादुर जोशी अन तयेत्यंगु चिताया थीथी पक्षयात कयाः थःगु खँ तयादीगु खः । उदाय् समाजया नायः डा. रुपज्योति कसाःजुं झी सकसित हित जुइगु कथंया ज्या न्ह्याकागु धारणा तसें थुकथंया ज्यां वातावरण मैत्री जुइगु बिचाः तयादीगु खः । उदाय् समाजया कर्णदीप व्यवस्थापन समितिया संयोजक उदय रत्न कसाःजुं न्ह्याकादीगु ज्याझ्वलय् थीथी सी गुथिया गुथियारपिनिगु सहभागिता दुुगु खः । थुगु चिताया डिजाइन ई डा.चन्द्र बहादुर जोशी, व ई रोशन अमात्यपिंसं यानादीगु खः ।