कुँ वयेक सेकुवा छुइ मदु

येँ (नेपालभाषा टाइम्स)÷येँ महानगरपालिकां सतक पेटीइ कुँ वयेक सेकुवा छुयाः मी मदइ कथं रोक लगे याःगु दु । महानगरपालिकां पुतली सतक, सिनामंगल लागाय् सेकुवा छुइगु यानाच्वंगुलिं थुकिं यानाः वायु प्रदुषण अप्वःगु धासें कुँ वयेक सेकुवा छुइगु ज्याय् प्रतिबन्ध तःगु खः ।

सेकुवा छुयाः मीगु ज्यां वायु प्रदुषण अप्वःगु, सतक पेटीइ न्यासी वनीपिं यात्रुयात सास्ती जूगु धकाः कल सेन्टर व वडाय् आपालं गुनासो वयेवं थुकी प्रतिबन्ध तयेमाःगु खँ महानगर प्रहरी प्रमुख राजु पाण्डें धयादीगु दु ।

महानगरं थ्वहे वइगु वालंनिसें सेकुवा पसःतय्त सुचं बियाः येँमनपाया फुक्कं क्षेत्रय् थ्व नियम लागू जुइगु खँ धाःगु दु ।

पसल्यातय्सं मेपिंत लिच्वः लाइ कथं कुँ पिकाल धाःसा न्हापां सचेत याकेगु व वयां लिपा नं माने मजुल धाःसा कारबाही यायेगु तयारी यानाच्वंगु खँ धाःगु दु ।
वंगु छुं ई न्ह्यवंनिसें राजधानी येँ देय् वायु प्रदुषणया ल्याखं विश्वय् हे दकलय् अप्वः प्रदुषित शहर खः धकाः नां पिहां वःगु खः । वयां लिपा मनपाय् सेकुवाया कुं प्रदुषण अप्वल धकाः फोन वयेगु शुरु जूगु खः ।