कोलोराडोय् नेपाल परेड डे

येँ(नेपालभाषा टाइम्स)- वि.सं. २०८० न्हूदँया लसताय् अमेरिकाया कोलोराडोय् च्वनाच्वंपिं नेपाःमिपिंसं ‘नेपाल परेड डे’ हंगु दु । न्हूदँया लसताय् जूगु परेड डेया झ्वलय् भिंतुना कालबिल नं याःगु खः ।

रकि माउन्टेण्ड फ्रेन्डस् अफ नेपाल ग्वसाः, हेल्पिङ ह्याण्डया ग्वाहालि जूगु नेपाल परेड डे ज्याझ्वलय् कोलोराडोय् च्वंगु नेपाःपिनिगु दक्वं संघसंस्थाया सहभागिता दुगु खः । कोलोराडोया बोल्डर नगरया मेयर आरोन ब्रकेट विशेष पाहांकथं झायादीगु ज्याझ्वलय् नेपाः व अमेरिकाया ध्वाँय्लिसें प्लेकार्ड, लाखे प्याखं, धिमे बाजं थानाः नगर परिक्रमा याःगु खः ।

स्थानीय खुल्लामंचं शुरु जूगु परेडय् मचांनिसें ज्याथःजिथिपिंसं तकं उत्साहहजनक रुपं ब्वति काःगु खःसा नेपाःमित तपाःलं सुरुवाः, हाकु पतासिलिसें थःथःगु जातीय म्हसीका पिज्वइगु भेषभूषाय् सहभागि जूगु खः । उगु इलय् लँ सिथय् च्वनाः स्वयाच्वंपिं स्थानीतय्ं ‘ह्याप्पी न्यू इयर’ धकाः लापा थानाः लसकुस याःगु खः ।

नगर परिक्रमा लिपा जूगु सभाय् हेल्पिङ ह्याण्डया अध्यक्षलिसें नेपाल परेड डेया संस्थापक नारायण श्रेष्ठं बोल्डर सहरय् बसोबास याइपिं नेपाःमिपिनिगु ल्याः अप्वयेवं नेपाःया कला, संस्कृतिया म्हसीका बीत परेड डेया ग्वसाः ग्वयागु जानकारी बियादिसें निक्वःतक लिज्याःगु बोल्डन सहरया मेयरया नेपाः भ्रमण आः याकनं हे याकेगु तयारी जुयाच्वंगु जानकारी बियादिल ।

विशेष पाहां मेयर ब्रकेटं न्हूदँया भिंतुना बियादिसें आपालं ल्याखय् नेपाःमित मुनाः थःगु मातृभूमिया पहिचानया निंतिं छप्पँ जूगु खनाः थः तसकं लय्ताःगु व थुकथंया ज्याझ्वः दँय्दसं मदिक्क न्ह्याना वनेमा धकाः नं भिंतुना बियादिल ।

कोलोराडोया बोल्डर सिटी एण्ड काउन्सिलया ज्याकुथिं सन् २००४ निसें अप्रिल महिनाया स्वंगूगु आइतवाः नेपाःमिया न्हूदँया लसताय् ‘नेपाल परेड डे’ जुइ धकाः औपचारिक घोषणा यायेवं नेपाल परेड डे ज्याझ्वः निरन्तर रुपं जुया वयाच्वंगु दुसा अमेरिकी सरकारपाखें स्वीकृत जुयाः सूचीकृत जुयाच्वंगु थ्व नेपाःमिपिनिगु न्हापां दिवस नं खः ।